Hpakant De Shani Shagu Majan Byin Nga
Dai Hpawt Hpakant Lahta Tsang Hpaji Jawng Kaw Laknak Kaba Wa Hkrat ai Majaw, Jawngma 2 Hkala
Ndai laman Myen Hpyen dap ni Hpakant Seng Tawng hpe bai lu la na matu hpyen n gun kaba hte htu taw ai majaw, Majan shani shagu laja lana byin taw ai lam chye lu ai.
Lai wa sai bat manga ya shani kaw na Mashi Kakahtawng kyuhpyi bum de n gun bang na htim gasat wa ai majaw,Bat kru ya shani the mani laban ya shani majan laja lana gap gasat hkat wa ai nga Hpakant ginra masha langai KNG shiga dap de tsun dan ai re.
“Ya hte lai wa sai bat manga ya shani kaw na, Myen Hpyen ni Mashi Kahtawng Kyuhpyi bum maga de masha jat bang na laja lana gap gasat wa ai, laja dik gaw Mani hte Mani Shawng shani re ga rai nga ai, Seng Tawng de shang na matu gaw kaja nga yang Yuma lam kaba hku na shang yang loi dik, ni dik rai nga ai, rai tim, anhte bu ni ထုံးဘို ၊ဂျန်ဂတ် ရွာဟောင် kaw shara la da ai re nga yang, Seng Tawng kaw wa dung tim, zim rai lu dung na n re majaw gaw, Seng Tawng Mare dingsa lam maga hku na htim gasat wa ai ga rai nga ai,” nga tsun dan ai re.
Myen Hpyen Dap ni Seng Tawng hpe bai htim gasat mayu ai masing the KIA ni shara la da ai, ထုံးဘို ၊ Jam Gat, Seng Tawng Mare Dingsa shara ni kaw, KIA dap jung shara la da ai majaw, dai lam maga hku htim gasat taw nga ai mung rai nga ai.
Myen ni hpyen n gun kaba hte htu shadut taw nga ai majaw, Ndai laman Hpakant kaw laja lana gasat poi bai byin taw nga nna, dai hpawt Manap hkying 9 chyen ten daram hta, Hpakant lahta tsang jawng kaw laknak kaba wa hkrat bun wa ai lam chye lu ai.
Dai hpawt manap jawng lung laika sharin hpang wa ai ten, gara maga de na re n chye ai laknak kaba si Hpakant Kalat Kung lahta tsang hpaji jawng, KG+ gawk kaw wa hkrat ang ai majaw, Jawngma marai 2 sha hkala hkrum wa ai re.
Dai hkala hkrum wa ai jawngma yan lahkawng gaw, asak 11 ning re ai Tsang (4) na
Shd Lin Hkant Ko hte asak 10 ning re ai Shy Roi Din (tsang 4) yan re lam chye lu ai.
Dai hkala hkrum ai Ma yan hpe ya ten, Hpakant Mung Shawa tsirung hta a tsawm sha tsi tsi hkam la lu taw sai lam matut chye lu ai.
Hpaji jawng kaw laknak kaba wa hkrat ai majaw, Jawngma kanu kawa ni yawng, Jawngma ni hpe sa woi la kau nna, dumbri dumbra rai kasu kabrawng lam byin wa ai hpe chye lu ai.
Ya ten, Myen Hpyen dap gaw, Hpakant hpe kalang bai n gun dat htim gasat wa taw ai majaw, Hpakant ginra majan majan kalang bai laja wa na masa nga ai lam, ginra masha ni tsun maram nga ma ai re.
