Waimaw makau grup yin hta Myen hpyen Dap nbungli the wa gap bun nga

Waimaw mare makau grup yin hta n dai laman hpyen masa bai shaja hkat wa nna, Myen hpyen dap maga nbungli the shani shagu wa gap bun nga ai lam ginra masha ni tsun ai re.

Myen hpyen dap maga na n dai laman shani shagu ngu na, Wuyan, Mukchyik, Namwa, Gaw Set Yang, Wa Shawng, mare hkan shani shagu  nbungli hte bawm sa jahkrat bun taw ai lam ginra masha langai ndai zawn KNG de tsun dan ai re.

“Sadung lam maga de mung ding yang wa gap bun nga ai, lam makau hkan, mare de grai wa sawng hkra gap bun ai lam gaw n nga ai, Wa Shawng makau grup yin hkan mung gap taw nga ai, n ta n kau hkan mung hkra ai, ဆည်မြောင်း  maga de mung hkra ai,” nga tsun ai re.

Myen hpyen dap maga na ya na zawn nbungli hte shani shagu sa gap gasat taw ai majaw, Waimaw makau grup yin de majan bai byin wa na gaw, ga lahtum n shut re nga ginra masha wa  ndai zawn matut tsun dan wa ai re.

“Ya na n dai masa hku sha rai yang gaw, Waimaw makau grup yin de majan bai byin wa na gaw ga lahtum n shut re, Myen ni mung shagri grai brep taw sai, dai majaw shanhte kam ai hpung Sara ni hpe shaga la nna, ndai shara ni kaw na Shanglawt ni hpe n lai ya na matu tsun shangun ai lam ni mung nga ai, ya gaw shan the htu tim n htu tim majan gaw byin na sha rai nga ai,” nga matut tsun dan wa ai re.

Myen hpyen dap maga na ya na zawn majan byin ai lam n nga tim, nbungli the wa gap sharu bun taw ai gaw, mung shawa ni hkrit mat hkra hte KIA PDF dap ni hpe madi shadaw ai lam n nga mat hkra galaw taw ai re nga mung shawa ni tsun maram da ai re.

Myen  hpyen dap maga nbungli the wa gap gasat ai majaw, hpyen yen mung shawa n kau bai htawt sit hprawng yen ra ai ni mung nga ai lam chye lu ai.