Hpyen masa a majaw Hugawng Lido lam mayan hkauna galaw ai masha grai yawm mat

Hugawng Lido lam mayan hta, mung masa, hpyen masa  a majaw, Hkauhting Hkauna galaw ai masha grai yawm mat ai majaw, du wa na shaning hta lusha n-gu yak hkak wa na masa nga ai lam ginra masha ni tsun ai re.

Hkauhting hkauna magam bungli hpe madung galaw let nga ai, Nawng Mi, Wara Zup, Jahtu Zup mare hkan na mung shawa ni gaw, dai ning na hpyen masa mayak lam a majaw, hkauhting hkauna galaw ai masha shawoi shaning hkan na hta grai yawm mat ai majaw, Du wa na shaning hta lusha yak hkak wa mai ai lam ginra masha langai KNG de ndai zawn tsun dan wa ai re.

“Ya dai ning gaw majan byin wa na zawn zawn nga na, hkau na mung gadai nau n shang, nta shagu mare shagu mung hpyen hkrai bai lahkawn ja, rai yang gaw, dai ning na ladaw gaw, hkau na shang ai masha nau n nga wa ai ga rai nga ai,” nga tsun ai re.

Lai wa sai March Shata kaw na Jinghpaw mung ting madang KIA htim shagrawt majan baw wa ai majaw, Danai Lido lam de mung majn byin wa na masa nga ai nga shiga ni mawng wa ai majaw re nga matut tsun ai re.

Ndai zawn hpyen masa a majaw, Jahtu Zup hte Wa Ra Zup hkan na mung shawa nkau Mogaung, Namti ni de tau hkrau nna hprawng yen taw ai ni nga ai zawn, n kau rai hkyen da ti nga taw ai ni mung nga ai lam chye lu ai.

Ya na zawn hpyen masa lam a majaw, mung shawa ni galaw lu galaw sha n gwi yak hkak wa ai re nga ginra masha langai matut tsun dan wa ai re.

Jinghpaw mung ting hta hkau-na galaw law dik shara hta, dai ning na zawn hkauna n lu galaw ai masha law mat ai rai yang du wa na shaning ni hta N-gu lusha yak hkak wa na masa nga ai lam,ginra masha ni tsun maram tawn ai re.