Hpakant, Ngapyawtaw lawk, Hpapyin mare hpunggyi jawng hte Mawtawng mare ni hta laknat kaba si hkrat kapaw ai majaw mungshawa marai 2 asak si sum nna marai 11 gaw hkala hkrum ai lam, Hpakan ginra masha ni KNG hpe tsun ai.
September 16 ya shani ka-ang hking1 grup yin, Hpakan Ngapyawtaw mare lam ka-ang kaw laknat kaba si hkrat kapaw ai majaw la wa ngan lahkawng kalang dat asak si sum mat nna marai 11 gaw bawm hkyep hkra nna hkala hkrum mat ai nga, Hpakan mung shawa langai, ya na zawn tsun ai.
“Hpakan myo ntsa kaw nan hkrat ai. langai gaw asak 50 ning re hkyi ya shi hpe gaw makoi mayam kau ma sai… hpang langai gaw asak 20 ning grup yin sha re shi ma kalang dat si mat ai dai wa hpe gaw yinhkoi yung de sa daai. shi na ph gaw lock nmai hpaw ai majaw nta masha ni hte matut mahkai nlu shi ai…. Ph lock hpaw na nta masha ni hte matut mahkai lu hkra shakut taw nga ai.”nga nna shi gaw tsun ai.
Asak si sum mat ai marai lahkawng kaw na asak 20 jan hte asak 50 daram re kawa la ni re lam chye lu ai.
Bai nna Zabula hpalap seng kaw masha langai, Kunya seng kaw langai, Aungtiha gat seng kaw gat mari taw ai masha langai , hpyen yen langai hte laga amying nchye ai mung shawa langai yawng pawng marai 5 gaw pala hkra na hkala hkrum ai nga tsun ai re.
Dai sha n ga Hpapin mare hpunggyi jawng kaw mung laknat kaba si hkrat kapaw ai marang mung shawa marai 5 hkala hkum ai chye lu ai raitim ph line mayak a majaw kata lam atsawm tup hkrak n chye lu shi ai nga mung shawa ni tsun ai re.
Dai zawn sha Hpakan kaw na Hpapin sa ai lam Uru hka makau na Mawtawng mare hta mung laknat kaba si hkrat na ramma langai hkala hkrum ai raitim nau ntsang ra ai lam chye lu ga ai.
September 16 ya shani jahpawt hking 4 daram kaw na Hpakan Byuha kawng na myen hpyen dap gaw majan byin nga ai Seng Tawng mare de laknat kaba gap sharu bun nga ai zawn, rawt malan hpung maga na mung Byuha kawng hpe bai htim gasat ai lam ni galaw nga ai nga Hpakan mung sawa ni tsun ai re.
Dai majaw Myo kata hte Myo shinggan kaw hkrat kapaw ai laknat kaba ni gaw gara wuhpung ni na re ai nga atsawm tup hkrak nchye lu ai nga nna Hpakan Lunghkin mare na mung shawa gaw ya na zawn tsun ai.
“jahpawt hking 4 kaw na dingyang gap taw ai Byuha kawng kaw na, dai majaw Myo kaw hkrat ai laknat kaba gaw gara wuhpung na re ai ngu hpe tsun na yak ai…. Rawt malan hpung mag ana mai byin ai zawn myen hpyen dap na ma mai byin ai… Mawtawng maga hkrat ai chyawm myen hpyen dap maga na mai byin ai… ya yang gaw Hpakan Myo kata kaw mung laknat kaba hkrat na hkrit tsang nga taw ma ai”nga nna tsun ai.
September 7 ya shani kaw na hkang wa ai Seng Tawng majan gaw dai ni du hkra hpyen dap lahkawng maga hpyen masa ja nga dingyang rai nna, myen hpyen dap maga de na laknat kaba hte nbungli ni hpe lang nna dingyang gap sharun bun nga ai lam Hpakan mung sawa ni tsun ai re.
