Hpakant Hta Myen Hpyendap Helicopter Hte N Gun Jat Bang
n gun jat ngut ai hpang, mare kata Myen hpyenla n kau yan hkawm
Hpakant ginra hpyendap ni hta Myen hpyendap gaw helicoptor hte hpyen n’gun jat hkawm taw nga ai lam chye lu ai.
Lai wa sai Auguest shata 15 ya shani Lamawng hte Tawmaw Myen hpyendap shara lahkawng hpe KIA dap ni zing madu la kau ai hpang August 23 ya shani kaw nna gaw, hpyen nbungli hte lani mi kalang n-gun marai 30 daram hpe jat bang taw nga ai lam, Hpakant ginra masha ni tsun dan ai re.
August 23 ya shani, hpyen n-gun wa jahkrat kau da ai nbungli bai rawt mat wa ai shaloi Hpakant byuha dap kaw nna laknak kaba masum lang daram gap jahkrit ai lam ni majaw, lungseng htu masha langai hte Sengtawng lawk na amyu shayi langai hkala hkrum ai lam chye lu ai re.
Bai, Hpakant ginra hta Myen hpyendap daru magam zing kau ngut ai hpang, Myen hpyen byuha dap nkau hpe shanglawt maga na zing madu la kau ngut ai hpang, dai Myen hpyenla ni gaw shawoi na zawn mung masha ni lapran dan dan leng leng pru hkawm sa ai lam ni nau n nga mat sai re.
Ratim mung hpyen n-gun bai jat hpang kaw nna, Hpakant gat lam hkan, hpyen hking hte marai 5, marai 10 yan hkawm ai hpe bai mu lu ai lam hpakant ginra masha ni tsun dan ai re.
Hpakant mung, Jinghpaw mung kaga ginra ni zawn sha, Ph-Internet line yawng pat da hkrum ai majaw ginra kata kaw byin ai masa lam ni hpe atsawm tup hkrak chye lu na matu mung naw yak nga ai re.
