Myitkyina-Mandalay mawdaw lam kaba pat da ai majaw Jinghpaw mung kata gunrai manu grai rawt wa ai lam, Myitkyina kata nga ai mungshawa ni KNG hpe tsun ai.
August shata 16 ya shani kaw nna Myitkyina-Mandalay lam kaba mayan KIA pawng hpawng dap hte Myen hpyen dap lapra majan laja lana byin nga ai majaw dai ni bat 2 jan du hkra mawdaw lam ni pat da hkrum ai re.
Ya na zawn masa lam ni a majaw Myitkyina de lung wa ai gun rai htaw mawdaw law malawng chyat rawng taw nna Myitkyina hte Jinghpaw mung ginra ni hta gunrai manu ni grai tsaw rawt wa ai mung re nga ai.
“gunrai manu gaw jahprawt hte shana pi nbung ai. Jahpawt gaw manu amyu ni shana gaw myu mi re majaw nkau seng ni pi pat da ma ai. Mani mari ai hpe dai ni bai dut yang pi arang bai nlu mat ai nga tsun taw ma ai. Rai ni shang ai gaw nga tim grai hpu ai dai majaw na yang grai jamjau sana ra ai lu na sha na pi nloi sai”nga nna Myitkyina kaw na amyu shayi langai gaw tsun ai.
Majan a majaw Myitkyina-Mandalay lam pat da ai majaw ya yang Myitkyina hta Udi langai myen lap hkingmi masum tsa(1300) Bakhkri si lahkawng hpe hking masum(3000) hte joi mi munmi hking manga(15000), sha sau joi mi mun lahkawng(20000), shakrau hpraw mun lahkawng hking manga(25000) du hkra manu htu rawt taw ai lam chye lu ga ai.
Dai sha n ga Myitkyina kaw gunrai ni dumhprut wa ai majaw Myitkyina kaw na gunrai ni sa ya taw nga ai Putau, Chyihpwi, Hpakant zawn re mare kaba hkan mung grai yak hkat wa ai nga nna ginra masha ni tsun ai re.
Dai zawn sha hpyen yen dabang hkan mung ph hte internet line ni sha n ga laga mayak amyu myu a majaw hpyen yen ni hpe shata shagu n gu the gumhpraw garum ya nga ai Word Food Program(WFP) wuhpung ni kaw na mung garum ningtum ni mung July shata kaw na ndu mat sai lam hpyen yen mungshawa ni kaw na chye lu ai.
Dai re ai majaw ya yang hpyen yen mung shawa ni malu masha dumhprut wa nna jamjau nga ai nga, Waimaw Hkanna hpyen yen lit hkam gaw ya na zawn tsun ai.
“madung yak ai gaw n gu re nga , n gu sha nga yang gaw hpa the wa mi sha sha mai tam sha ai , shamai shamaw ni nam kaw na mai tam sha ai ,nkau gaw sha na shat pi nnga sai dai ni hpe gaw hpung kaw na lu da ai htam shi kaw na bai garan jaw matu gaw hkyen da ai . aten galu yang chyawm grai yak wa na ra ai. Waimaw na hpey masa lo zim mat yang chyawm shi the shi gaw hkyem sa wa na re” ngu nna shi tsun ai.
Myitkyina- Mandalay mawdaw lam gaw ya ten du hkra pat da ai rai nna galoi bai hpaw na ngu ai gaw aten naw na ai masa re ai lam mawdaw la ni the rawt malan hpung ni KNG hpe tsun ai re.
“Myitkyina lam masa gaw naw pat nga dingyang re, anhte na mawdaw ni pa naw 10 ya daram la na bai nhtang wa ai,ya gaw Mandalay du sai, lam hpaw na masa lam gaw nnga shi ai naw na nan ga tsun ma ai hkrun lam hkawm ai ya gaw ya pat da ai shara kaw na seng ke the sen lahkawn jaw na lai taw ma ai, ya chyat rawng taw ai ni gaw Myitkyina kaw na lung wa ai na Mawlu Mawhan kaw chyat taw ai nga re nga”ngu nna Myitkyina-Mandalay lam ntsa mawdaw gau ai mawdaw la gaw tsun ai.
Ya yang na Jinghpaw mung a masa lam gaw Kyat lap manu yawm ai sha n ga mawdaw lam pat ai mayak ni mung hkrum sha taw ai majaw laga Myo mare ni hta gunrai manu ni mung htam masum ram grau tsaw taw ai re nga ai.
Dai majaw Myitkyina-Mandalay lam pat taw ai aten gunrai ni hpe nbungli the htaw gayin ai lam ni nga ai zawn Miwa mung maga na mung gunrai ni shang ai lam nga ai nga Myitkyina ginra masha ni kaw na chye lu ga ai.
