Myitkyina mare kaba hka kaba ai lam July praw 1 ya shana yuptung teng daram kaw na gau ngwi ngwi hka yawm mat wa ai gaw, dai hpawt manap ten tsang ra ai shadang hta na tsep kawp yawm mat sai lam chye lu ai.
Myitkyina Malihka tung kaba wa ai gaw, July praw 1 ya shana hkying 10 chyen aten hta tsaw dik 1406 Cm hta wa du ai hpang kaw na, dai hpawt maga de gau ngwi ngwi na yawm mat wa ai gaw dai hpawt du hkra rai yang, Pe 10 jan yawm mat sai nga, Myitkyina ginra masha ni tsun ai re.
Ya ten Myitkyina ကြက်ပေါင်ခြံ lawk hte Rambu lawk zawn re ai ni hta hka matut ing taw nga nna, dai kaw pat hkrum taw nga ai mung shawa ni hta garum ningtum lam ni matut ra ahkyak taw nga ai lam chye lu ai.
Myihprap wan yak hkak taw nga ai Myitkyina hka kaba ai lam hta ya ten garum kahtau hpung ni hku na mung jak sau seng ni yawng pat da ai majaw, jaksau mayak hkrum nga ai re.
Myitkyina mare kaba hta hka hkyet mat wa sai rai tim, myihprap wan n lu ai hte laga mayak lam ni law law matut byin nga ai majaw, garum kahtau hpung ni matut ra ahkyak taw nga ai re.
Dai ning na Myitkyina hka kaba ai lam gaw lai wa sai 2004 ning na hta grau kaba ai lam mung shawa ni tsun taw ai rai tim, lamu marang yu maram magam dap na tsun n dau da ai lam hta dai shaning na hte tup hkrak ram wa byinn ai nga tsun da ai re.
Ya matut na rai tim, Mali hka nam maga de nga ai ni hta hka matut kaba wa mai ai majaw, dai de nga ai mung shawa ni matut sadi nna, nga na lam lamu marang yu maram magam dap na tsun n dau da ai re.
