Jinghpaw Mung De Majan Wa Gap Lawm Ai Dingda Ginwang Ginjaw Kata Na Share Ninghkring Ni Hpe Namhpakka Mare hta Hkap Tau
Dingda Ginwang Ginjaw kata na Jinghpaw Mung de majan wa gap gasat ai magam gun ni hpe Namhpakka mare hta June 13 ya shani hkap tau hkalum la ai lamang hpe galaw wa ai re lam chye lu ai.
Namhpakka mare kaba hpe htim gasat zing madu la ngut ai hpang, Jinghpaw mung Ginjaw ginra makau grup yin na Myen hpyen dap shara hpe htim gasat ai hta, Mungmyit Sinli Dingda Ginwang Ginjaw kata na hpyen magam gun ni shang htim gap gasat lawm wa ai lam Mungmyit Sinli na magam gun langai KNG shiga dap de tsun dan ai re.
“Anhte Namhpakka hpe lu zing ai 10 ya jan sha naw rai yang, ndai dingda ginwang ginjaw kata na magam gun marai 300 hpe ginjaw de shaga ai, dai de shaga na anhte maga na ni mung 300 tup Ginjaw ginra makau grup yin na majan hta wa shang gasat lawm na ya gaw kanu ngu na ndai anhte shara de bai du yu wa sai ga rai nga ai,” nga tsun ai.
Dingda ginwang ginjaw na magam ni madung shang htim gasat ai shara ni gaw, Laiza ginjaw makau na Myen hpyen dap shara ni hte Nmawk hte Loi Je lapran na Myen hpyen dap ni hpe htim shagrawt ai hta magrau grang grang shang gasat lawm wa ai re lam chye lu ai.
Dingda ginwang ginjaw kata na hpyen n-gun 300 shang lawm ai majan hta, Jinghpaw mung kata na Myen hpyen dap shara 100 jan hpe htim shagrawt padang dip zing la lu wa sai re.
Ya na zawn Ginjaw Ginra makau grup yin na Myen hpyen dap ni hpe htim shagrawt gasat ngut ai hpang, tinang kanu dap shara de bai n htang wa ai hta, mung shawa dap shawa ni kaw na hkap tau hkalum wa ai rai nga ai.
Mungmyit Sinli ginra Dingda ginwang ginjaw kata hta, Dapba 4, Dapba 6, Dapba 10 ni lawm ai re.
