Nmawk Manje Majan Bat Lahkawng Laman Hta Mung Shawa Dum N’ta 250 Daram Wan Hkru Hten
Nmawk hte Manje majan nhtoi bat lahkawng laman hta mung shawa dum n’ta 250 jan wan hkru hten hkrum wa sai lam, ginra masha ni kaw na chye lu ai.
Majan nhtoi bat lahkawng laman Myen hpyen dap maga nbungli bawm, laknak kaba ni hte hkrup mara gap sharu bun ai majaw, Nmawk mare na mung shawa dum n’ta, gat seng yawng 200 hkawt wan hkru hten mat nna, Manje mare hta gaw nta htinggaw 50 daram hkra hten sai nga dai ginra na mung shawa ni KNG shiga dap de tsun ai re.
“Laknak kaba hkra na hten ai hte wan hkru hten ma ai hte hpa n ngam sai, anhte mung kata de a tsawm gaw rai n lu wa yu shi ai majaw, gade hkru mat sai hpe a tsawm n chye shi ga ai, ntsa lam maram yu yang gaw 50 ram gaw she n rai nna, Myen hpyen dap shani shagu nbungli hte wa gap sharu bun nga ai gaw,” nga Manje ginra masha langai tsun ai.
Manje Myen hpyen dap 319 hte 601 dap shara ni hpe May 17 hte 18 ya nhtoi lahkawng ya laja lana htim gasat wa ai hta lahkawng maga sum machyi lam law wa ai re.
Dai zawn sha Nmawk Myen hpyen dap Hk.M,Y (437) dap hpe laja lana htim gasat ai hta, Myen hpyen dap maga nbungli bawm, laknak kaba ni hte ding yang wa gap sharu bun wa ai majaw ya na zawn hkru hten wa ai rai nga ai.
Nmawk majan hta dum nta 200 daram hte hpawn, Nawku Jawng, Hpaji Jawng, Gat ni yawng hkru lawm mat sai re.
Nmawk Manje mare ni de May praw 7 ya shani kaw na numdaw kalang n-gun kaba hte htim gasat shang wa ai gaw, Mare makau grup yin na Myen hpyen dap hte balik dap shara ni yawng hpe htim gasat zing madu kau ma lu ai rai tim, Mare kata na Myen hpyen dap kaba hpe gaw dai ni ten du hkra rai n lu gasat zing la shi ai re.
Matut na rai tim Manje hte Nmawk dap shara ni hpe lu la na matu, dai na maga de hkra laja lana htim gasat taw nga ai lam chye lu ai.
