Shwenyaung Pin Myen Hpyen Dap Hta Lai Nna Laga Ngam Ai Shara Yawng Lu Zing Sai
Waimaw Ginwnag kata na Myen Hpyen dap shara ni hpe htim shagrawt gasat nga ai hta, May 19 ya shana Katsu Myen hpyen dap hte hpawn, shara law malawng hpe htim gasat zing madu kau lu sai lam chye lu ai.
May 18 ya jahpawt kaw na htim shagrawt hpang wa ai gaw, dai ni ten du hkra rai yang, Shwenyaung Pin Hk.M,Y (321) hta lai nna, laga dap shara ni yawng hpe htim gasat zing madu kau lu sai lam shawng lam hpyen shi sawk ni tsun ai re.
“Bum mayan de na gaw yawng ma sai ga rai nga ai, ya naw ngam ai gaw, Shwenyaungpin (321) dap sha ngam sai, lam kaba mayan na mare yawng hpe lu zing sai,” nga shawng lam magam gun hte ni nawn ai ni tsun ai re.
Shwenyaung Pin Myen hpyen dap hpe dai hpawt manap hkying 5 daram kaw na laja lana matut htim gasat taw nga nna, dai dap shara hpe mung lu zing na masa de du nga sai lam, dai majan hta shang lawm ai magam gun ni tsun ai re.
Ndai laman htim gasat zing madu la lu sai dap shara ni gaw, Byinpu Kawng, Wuhtau Bum, Laihpawng, Dingga, Lungzep Kawng, Katsu, Aungmye (1), Aungmye (2) mare ni hpe ndai lahkawng ya laman hta htim gasat zing madu kau lu ai rai nga ai.
Katsu Myen hpyen dap shara hpe May 19 ya shana hkying 8 daram ten hta yawng zep zi htim gasat zing madu kau lu sai rai nna, ya ten dai shara yawng hpe KIA dap maga up madu da lu sai re.
Shwenyaung Pin hta dap jung nga ai Myen hpyen hpung ni gaw, mare kata shinggan shara ni hta dap jung nga taw ai hpe KIA dap maga matut htim shagrawt taw nga ai re.
Ya ten Waimaw mare kaba hte Deng 3 daram sha tsan ai Hka Shi mare makau hta, pawng hpawm dap maga shara la nga ai rai nna, Myen hpyen dap maga mung, nbungli laknak kaba ni hte laja lana gap bun taw nga ai re.
Waimaw mare kaba makau grup yin ni hta majan laja lana htim gasat hkat taw nga ai majaw, Hkat Cho hka li daru hpe mung, dai ni shani ka-ang ten kaw na pat kau sai lam dai ginra na mung shawa ni tsun ai re.
Myen hpyen dap kaw na gap shadam bun ai laknak kaba si n kau hpyen yen mung mare masha ni nga ai shara makau ni hta wa hkrat kapaw ai lam ni ding yang byin nga ai re.
