Wuyan Mare Masha Ni Hprawng Yen Nga Ai Hkanan Hpyen Yen Dabang Hta Malu Masha Dumhprut Wa Nga
Waimaw Muk Chyik hte Nawng Hkyu mare maga de hprawng yen taw nga ai Wuyan hpyen yen mung shawa ni gaw, ya ten malu masha dum hprut wa nna, nga shara na matu Plastic muga ni ra ahkak taw nga ai lam chye lu ai.
Lai wa sai April praw 7 ya shani kaw na hprawng yen taw sai, Wuyan mare masha ni gaw, mare hte deng 7 daram tsan ai Mukchyik hte Nawng Hkyu shara lahkawng garan let hprawng yen taw nga ai lam chye lu ai.
Ya na zawn hpyen yen ladaw shata lahkawng du wa ai hte rau tinang kaw lawm sa wa ai n-gu, sau malu masha ni ma mat wa sai rai tim, mare de bai wa n htang la na matu lam ni yawng pat mat sai majaw, malu masha yakhkak dum hprut wa taw nga ai lam, dai hpyen yen ni hpe yu lakawn taw nga ai magam gun langai KNG de tsun dan wa ai re.
“Anhte gaw shata lahkawng na matu sha lu sha hkyen sa wa ai, ya shata lahkawng jan wa yang gaw lu sha ni yak hka wa ai , ya ten madung gaw tsi mawan rai nga ai, hka n san seng ai majaw, kan mase gaya ai lam ni byin law taw nga ai ya gaw majan bai laja wa ai re nga yang lam mung yawng pat mat sai,”nga tsun dan wa ai re.
Hpyen yen mung shawa ni gan machyu rawng na ginsum ni hta Muga dingsa hte sha mai byin ai hku galup da ai majaw, ya aten galu na wa nna, marang htu wa ai rai yang, grai yak hkak jam jau wa na masa nga ai lam tsun ai re.
Dai shara hta ya ten tinang ding hkrai mai byin dang di ai hku hka htung ni htu la taw nga ai zawn, namdum ni hpe mung shangut shakre la na garum ningtum ra ahkyak taw nga ai lam matut tsun ai re.
Ya ten dai ginra hta majan laja taw nga ai majaw, hkrun lam yawng pat mat nna, gunrai dut ai seng ni mung n hpaw mat sai majaw, lu sha grau yak hkak wa sana re lam hpyen yen amyu shayi langai matut tsun dan wa ai re.
“Moi ya hkan gaw Waimaw ni de loi li naw wa mai mari ai, ndai lahkawng masum ya laman gaw pru hkawm n mai mat sai” nga tsun ai.
Wuyan mare masha ni hprawng yen taw nga ai Mukchyik hte gade n tsan ai shara hpe Hkanan hpyen yen dabang (1) ngu masat nna, Nawng Hkyu mare hpyen yen dabang hpe gaw, Hkanan hpyen yen dabang (2) ngu masat da ai rai nna, ya ten dai shara hta htinggaw (140) hte mung shawa marai (900) daram sa hprawng yen taw nga ai re.
Dai 900 hta jawng lung ai jawng ma yawng marai 200 daram lawm ai lam chye lu ai.
Hkanan hpyen yen ni hpe lai wa sai shata hta gaw, Metta Foundation wuhpawng ni kaw na, ding hku lang arung arai loi li garum jaw wa ai lam nga ai rai tim, ndai laman garum ningtum hpung ni gadai n sa mat ai majaw, tinang dang di dang dep ai made, hka htung, nam dum ni hpe muga hte mai byin ai hku galaw la taw nga ai lam chye lu ai.
Wuyan mare hta lai wa sai April shata praw kaw na, KIA hte KPDF dap ni Pyithutsit dap shara hpe sa gap ya ai hpang kaw na dai ginra na mung shawa ni hprawng yen ra wa ai rai nga ai.
Ya ten Waimaw Myen hpyen dap Hk.L.Y (58) dap hpe KIA dap maga wang da ai masa hta hpyen masa shaja hkat taw nga nna, dai makau grup yin hta shani shana gap gasat hkat taw nga ai re.
