Wunpawng Mungdan Shanglawt Hpyendap KIA Dap Awn Daju, Lat Du Daju Jum Rukhkyawng Hkawng Lum asak (62) Ning gaw May 13 ya shana hkying 6:23 Pm aten Sin hkraw Cancer ana hte n nga mat wa sai lam chye lu ai.
Dukaba Rukhkyawng Hkawng Lum, Sin hkraw Cancer ana machyi taw ai laning mi shata kru ram na sai raitim, rawt malan magam bungli grau ahkyak ai majaw, tsi tsi hkam la na lam hpe n lata ai sha, majan gap gasat na lam hpe mahtang lata la ai re nga, shi naw sak hkrung ai ten, manaw manang jinghku ni hpe tsun dan ai nsen file langai KNG hkap la lu ai re.
Du kaba a nsen hte tsun da ai dai nsen file hta “Ndai aten langai mi kaw sha majan gasat na i? tsi tsi na i? ngu gaw, ngai gaw majan gap gasat na ngu lata kau sai gaw, kaning chye di na, machyi jang sharang kau, majan de madaw u tsa pe mat, tsi gaw n tsi ai sha, bum tsi ni hte sha hting kau ra na, ya gaw loi pu dum wa na, daw mi ngut wa sai re nga yang, gara hku rai wa na kun n chye sa?” nga tsun da ai re.
Machyi makaw byin nga ai ten, Miwa gumsan mungdan hta mung tsi sa tsi hkam la wa nna, dum nta hta matut tsi tsi hkam la nga ai ten, n nga mat wa ai re lam chye lu ai.
Dukaba Rukhkyawng Hkawng Lum gaw, 2023 ning January praw 2 ya shani kaw nna, Wunpawng Mungdan Shanglawt Hpyendap KIA Dap-awn Daju magam lit hpe gun hpai wa ai rai nna, shi naw nga ai ten, 2024 ning kaw na gap gasat hpang wa ai Padang Majan Masing hta dap shara law law hpe padang dip zing madu la lu sai re.
Shi n nga mat wa ai ten du hkra KIA Dap Awn Daju magam lit hpe gun hpai wa ai sha n ga, NUG asuya hte lata gindun ai Myen mung lahta daw, masat (1) Sit Dal Da Mu magam lit hpe mung gun hpai taw nga ai re.
Ya na zawn Dukaba n nga mat wa ai a n tsa hte shi a kasi yu la mai ai lam ni hpe, NUG asuya Hkringmang salang langai rai nga ai, Dr. Hkalen Tu Hkawng ndai zawn tsun dan wa ai re.
“Shi gaw shi kungkyang ai amu magam bungli hpe a tsawm galaw ai, shi n chye ai kaw majoi mi hkan shang shalau hkawm ai lam n galaw ai, mung masa lam hpe shi chye ging ai the chye na re, rai tim mung shi na profestional gaw hpyen majan bungli re majaw, hpyen hte seng ai bungli hpe shi a tsawm hkrak shi woi galaw ai re, mung masa jahta ai kaw majoi n hkan brawp nang ai, grai kasi la hpa re, hpyen maga hte seng na shi gaw grai machyi shim ai re, woi galaw ai lam ni, tau hkrau na hkyen lajang ai lam ni grai hkrak ai, shi galaw ra ai lam hpe a tsawm hkrak galaw chye ai wa re.” nga tsun dan ai re.
Dukaba Rukhkyawng Hkawng Lum gaw, KIA a nhpan kum masing hta Sagaing jarit mayan de shi nan sa du gawan nna, majan masing ni hpe woi shakut shaja wa ai re lam chye lu ai.
Ya na zawn shi woi shakut shaja wa ai majaw, Jinghpaw mung kata na dap shara law law hpe mung lu zing madu wa ai re nga, shawng lam magam gun ni tsun da ai re.
Dukaba woi shakut shaja wa ai lam hte magam gun yawng hpe galoi mung shadum ai ga hte seng nna, shawng lam magam gun langai shi facebook n tsa hta ya na zawn tsun da ai re.
“Dkb galoi mung shadum ai ga kaba gaw ” Ngai nanhte hte rau ayan n lu nga ai n lu makawp maga ya lu ai, ရိုးသားမှုနဲ့ သမာသမတ်ရှိမှု hpe Lashum tawn Magam bungli hpe galaw sa wa mu, dai dinghpring ai lam, myit san seng ai lam gaw nanhte hpe makawp maga ya lu na re, magam bungli hpe mai kaja ai hte awng dang shangun lu na re” nga anhte hpe galoi mung tsun shadum ai ga hpe nye kraw lawang hta prat tup matsing sumhting mat wa na nngai.” nga ka da ai re.
Dukaba Rukhkyawng Hkawng Lum gaw 1988 ning, Yangon Dakkasu jawng lung nga ai kaw nna KIA magam dap de du shang wa ai dakkasu jawng ma langai rai mung rai nga ai.
