Loi Je gunrai hpaga ginlen dabang a, ahkyak ai Yaw Yung Bum Myen hpyen dap kaba hpe KIA dap maga dai ni shani ka-ang zing madu la lu sai re.
Nmawk hte Loi Je lapran na Simlum bum hte Yawng Yung bum dap shara ni hpe KIA dap maga, March 27 ya jahpawt hkying 7 daram kaw na htu shadut htim gasat hpang wa ai gaw, dai ni March 28 ya shani ka-ang hkying 11:30 aten, dai dap shara hpe zing madu la lu sai nga, Shawng lam dap ni hte ni nawn ai ni kaw na KNG de ndai zawn tsun dan wa ai re.
“Dai hpawt manap gaw Loi Je ntsa na Hpalang Bung (sh) Mada bum, Law Dan krung na Myen dap hte ndai Yaw Yung Bum dap kaba hpe zing madu la lu sai ga rai nga ai, Yaw Yung Bum kaw nga ai Myen hpyen hpung ni gaw mana kaw na hprawng pru mat sai, anhte maga dai ni she dap jasan kau lu ai ga rai nga ai” nga tsun dan ai re.
Labau shang Yaw Yung Bum Myen hpyen dap hpe, KIA dap maga lahkawng ya laman htim shagrawt kau lu ai rai nga ai.
Ndai lahkawng ya laman dai mayan na zing madu la lu ai Myen hpyen dap shara ni gaw Shangtai Bum, Bang Yau Bum, Law Mun, Hpalang bum (sh) Mada Bum, Law Dan hte Yaw Yung Bum dap shara ni re lam chye lu ai.
Dai Majan hta KIA Dapba 3 hte Dingda ginwang ginajaw kata na, Dapba 4,6,10 ni htim gasat taw ai re lam matut chye lu ai.
Ya htim gasat la lu ai Yaw Yung Bum dap shara gaw, Hpyen masa hta sha n ga, laga hpaga gunrai ginlen ai lam hta mung ahkyak ai dap shara re lam, mung masa yu maram ai sara langai ndai zawn tsun da ai re.
“Ya htim gasat taw nga ai Nmawk Loi Je lam kaba ntsa na Myen dap ni gaw, hpyen masa hta sha n-ga, hpaga lam hta mung ahkyak dik ai dap shara ni rai nga ai, Yaw Yung Bum hpe nga yang moi 1985 ning hta Myen mung Comunist hte Shanglawt dap pawng nna, htim gasat sai shara rai nga ai, rai tim sum machyi law ai hte sha bai hting nut kau da ai dap rai nga ai, anhte Jinghpaw mung na gunrai ni hpe Miwa mung de dai lam hku na sha madung htaw shalai ai re majaw, dai lam yawng gaw ahkyak ai ni hkrai rai nga ai” tsun ai re.
Dai ni htim gasat zing madu la lu ai Yaw Yung Bum Myen hpyen dap gaw, lai wa sai 1985 ning March 21 ya shani hta KIA hte Myen mung Comunist dap na hpyen n-gun 900 daram hte htim gasat yu sai rai tim, sum machyi law ai hte bai hting nut kau da ra ai dap shara re lam chye lu ai.
Ya ten Loi Je mare makau grup yin na Myen hpyen dap yawng ngu na daram hpe htim gasat zing madu kau lu wa sai rai nna, Loi Je mare kata hta nga ai Myen dap kaji lahkawng sha ngam sai lam chye lu ai.
