Nhtoi 4 Ya laman Myen Hpyen Dap Kaji Kaba 20 Daram Htim Gasat Zing Madu Lu
![](https://kachin.kachinnews.com/wp-content/uploads/2024/03/430254369_807482078079732_1421017083398040209_n-780x470.jpg)
Nhtoi 4 ya laman Myen hpyen dap a, ahkyak ai dap dung kaba langai hte hpawn byuha dap shara n kau hpe htim gasat zing madu la lu sai lam Dukaba Naw Bu tsun ai re.
March praw 7 ya jahpawt kaw na, Laiza makau grup yin hte Myitkyina Manmaw lam kaba ntsa na Myen hpyen dap shara ni hpe KIA htim gasat hpang wa ai hta, Dawhpum Yang Myen hpyen dap Hk.L.Y 142 hte Hka Ya Bum, Hpun Pyen Bum dap shara ni hpe zing madu la lu sai re.
Ya zing madu la lu sai dap shara ni gaw, Hpun Pyen Bum, Dawhpum Yang mare na Hkang Gai Bum, Pan Tsun, Gawkngu, Hkala Kadawng, Laja Yang Masen Kawng, Nau Ra Zinghka, Nlung Hka Pyithutsit dap hte laga dap shara kaji kaba yawng pawng 20 daram hpe htim shagrawt kau lu sai lam Dukaba Nhpang Naw Bu tsun ai re.
Myitkyina Manmaw lam kaba ntsa dai ni March 11 ya shani hta mung, Bumre Bum, Myothit, Kung Law mare kaba ni hta majan laja lana matut gap gasat hkat taw nga ai re lam chye lu ai.
Myen hpyen dap maga na mung, dap shara ntat sum hkra nbungli hte laja lana wa ninghkap shingla gasat taw nga ai re.
Majan a majaw, mung shawa yawng tinang man ang ai shara ni de mai byin ai ladat hte hprawng yen hkawm taw nga nna, Myen hpyen dap maga mung shawa ni hpe hpyen ninggang shatai da ai lam ni mung nga taw ai hpe chye lu ai.