Sinbo Myen hpyen dap Hk.L.Y (141) dap hpe KIA hte PDF dap maga laja lana matut htim gasat taw nga ai lam chye lu ai.
Sinbo mare hte deng (3) daram tsan ai Myen hpyen dap kaba hpe KIA PDF dap maga February 10 ya jahpawt kaw na sa htim gap gasat hpang wa ai gaw, dai ni ten du hkra majan laja taw nga ai re.
Dai Myen hpyen dap hpe KIA dap maga yawng wang da nna, htim gasat taw nga ai zawn, Sinbo mare yawng hpe KIA maga up madu da sai lam dai ginra na lit nga ai salang langai KNG de ndai zawn tsun dan wa ai re.
“Ya ten du hkra gaw Hpyen dap hpe rai n lu zing madu la lu shi ai, Majan matut laja taw nga ding yang re, Sinbo mare kaba hpe chyawm gaw anhte KIA PDF dap ni a lata kaw lu madu da sai” nga tsun ai re.
Sinbo mare kata na Balik dap gaw lai wa sai shata hkan na Myen hpyen dap hte pawng gahkyin mat sai majaw, ya ten Asuya rung shagu ngu na hpe KIA maga de na zing madu da lu sai rai nga ai.
Sinbo Myen hpyen dap hpe htim gasat ai hta, Myen hpyen dap maga nbungli hte lani mi lahkawng lang bawm sa jahkrat bun taw nga nna, ndai laman nbungli sa ai 5,6 lang rai sai lam chye lu ai.
Dai zawn nbungli hte Bawm sa jahkrat bun ai majaw, mung shawa dum n’ta hkra hten ai lam ni mung nga taw ai lam tsun ai re.
Myen hpyen dap laknak kaba gap bun ai majaw, Sinbo mare shingdu deng 6 de hprawng yen ai mung shawa amyu shayi langai mung asak si hkrum wa ai lam nga ai re hpe chye lu ai.
Dai ginra gaw, madung Mali hka lam hpe machyu let nga ai mare rai nna, ya ten jakli yawng hpe hkawm sa ai lam n galaw na matu hkum pat da ai majaw, mung mare masha ni mali hka kau mayan hta tinang mai byin dang di ai hku machyu hprawng yen taw nga ai re.
Ya htim gasat taw nga ai Myen hpyen dap gaw, lai wa sai shaning 20 ning daram kaw na kring mading rai dap jung shara jahkrat da ai dap kaba re lam, ndai zawn matut tsun dan da ai re.
“Dai dap shara gaw na sai, shaning 20 ning jan sai, dai kaw Myen hpyen n-gun 200 jan hte shata 6 daram sha na sau n-gu ni galoi mung jahting da ai, laknak machyu pala mung grung grung sha re, dai kaw dumsu bai nam rem na nga ai dap dung kaba rai malu ai,” nga tsun ai re.
Sinbo mare gaw, Myen asuya uphkang hkrang hta Myitkyina ginwang kata lawm ai rai nna, Myitkyina hte Manmaw lapran Mali Hka kau hta nga ai mare kaba rai nna, nta hting gaw 1000 jan nga ai mare re lam chye lu ai.
KIA woi awn ai PDF dap ni gaw, ndai laman Myen hpyen dap shara langai hpang langai hkan htim gasat zing madu la taw nga ai rai nna, hpyen majan shani shagu laja taw nga ai re.
