Ga Sau Htu Ai Hpe Ninghkap Ai Mung Shawa Ni Hpe KIA Bawm Kapaw Bun Nna, Nkau Hpe Htawng Rim Bang Da
KIA Dapba 7, Hpare Laksan ginra hta Ga sau n htu na matu, ninghkap ai ginra masha ni hpe KIA bawm kabai bun ai majaw, mung masha hkala hkrum ai lam byin ai zawn, htawng rim bang hkrum ai lam ni byin nga ai lam ginra masha ni kaw na chye lu ai.
Hpare mare masha ni lu hka shalen la ai Hka baw hka htung makau kaw, Shanglawt a hkang the miwa lauban ni Ga sau htu shaw na matu galaw nga ai hpe, February praw 7 ya shani, mi wa lauban ni hpe sa ninghkap ai ginra masha ni hpe, dai kaw shim lam la ya nga ai KIA ni hpang kaw na bawm kabai bun wa ai lam mabyin hpe Hpare ginra masha langai ndai zawn tsun dan wa ai re.
“Anhte hpe hka jaw taw nga ai hka baw hka lawng makau kaw nan Ga Sau htu na hku galaw wa ai majaw, mare masha ni wa ninghkap ai, dai kaw ga sau htu kau ai rai yang mare masha ni hka yak mat na, nga n mai mat na, dai majaw wa ning hkap ai, dai zawn wa ning hkap ai hpe Shanglawt Hpyenla ni gaw hpang kaw na hkan sa wa na majan gasat ai hku bawm hte kapaw bun wa ai, hkala hkrum ai ni gaw hkala, hprawng ai ni gaw hprawng rai, dai kaw wa ninghkap ai mung shawa marai 40 daram hpe htawng bang da ai, jahkrum mung n jahkrum shangun ai, lani mi shat da mi sha jaw sha na rim da ai,” nga tsun ai re.
Mare kata Ga sau n htu na matu, shanglawt hpe mare masha ni alang lang hpyi shawng, ninghkap sai raitim, ahkyak n la ya ai sha n ga, mare masha ni hpe mahtang rim shareng, jahkrit shama ai lam ni galaw ai majaw, ndai lang gaw, KIA hpe n tsun ai sha, Ga sau htu nga ai miwa lauban ni hpe nan dan tawk mare masha ni sa tsun ninghkap ai ten byin hkrum wa ai lam tsun ai re.
Dai Bawm kapaw bun ai hta mung shawa langai hkala hkrum wa nna, dai kaw lawm ai Hpare mare masha marai 44 hpe htawng rim shareng da ai lam matut chye lu ai.
Ndai lam the seng nna, KIO shiga magam dap lithkam Dukaba Nhpang Naw Bu KNG shiga dap kaw nna, matut mahkai san ai shaloi, ndai lam the seng nna, hpa shiga mung n na ai hte ndai lam hte seng na hpa mung n chye lawm ai nga tsun wa ai re.
Ya ten, Hpare ginra hta Phone line matut mahkai mung yawng pat tawn nna, KIA gaw, Ga sau htu ai miwa lauban a masha ni hpe sinat jahpai tawn let, mare masha ni n gwi sa hkra shimlam shagreng na sin taw ai re lam chye lu ai.
Hpare mare hta Gasau Nhtu na matu, mare kata nga buga hpung woi ni, mare salang ni, Laiza ginjaw de du hkra wa hpyi shawn yu sai rai tim, ginjaw kaw na, lit la ya ai lam hpa nnga ai nga Ginra masha wa ndai zawn matut tsun ai re.
“Ginjaw ni ma litla ya ai lam hpa n nga ai, lai wa sai ten anhte mare buga kanu kawa hpung sara ni ginjaw de nan wa hpyi shawn yu sai, hpa ahkyak n la ya ai, dai majaw ndai kalang gaw Ga Sau htu ai miwa ni kaw nan lung nna wa ninghkap ai re.” nga tsun ai.
Lai wa sai 2023 ning, October 23 ya shani mung, Hpare mare masha ni a hkai sun lamu ga the hkau na lamu ga shara hta , KIA kaw nna Ga sau htu shang wa ai majaw, Ga sau n htu ya na hku sa tsun ninghkap ai, Amyu shayi marai 25 hpe KIA kaw nna, htawng rim sharawng kau nna, bai dat dat ya ai lam byin wa sai re.
Dai sha n ga, May shata hta mung, Hpare mare na ramma ni ga sau hut ai lam n galaw na matu, KIA Dap Ba 7 dung 33 de laika hte wa hpyi shawn wa ai raitim, KIA gaw ramma ni hpe mahtang htawng rim bang ai lam, sinat lak nak hte jahkrit sharim ai lam galaw wa ai lam chye lu ai.
Matut na rai tim Wungpawng Mungdan shanglawt hpyendap KIA gaw, ndai lam hte seng nna, shiga dap hte online ntsa hkan sumla ni brawng wa ai rai yang, ja ja ahkyak la na hte mung shawa ni a asak shim lam hpe du hkra jahkrit sharim wa ai lam ni nga ai re hpe chye lu ai.
Hpare ginra hta, 2011 ning kaw nna Wunpawng Mungdan Shanglawt ginra hku masat uphkang hpang wa ai rai nna, 2018 ning kaw na, Hpare ginra hta Ga sau htu hpang wa ai re.
2018 ning hta Ga sau htu hpang wa ai hpe sa ninghkap ai mung mare masha ni hpe KIA wang da nna, sanat gap bun ai majaw, mare masha marai 2 hkala hkrum wa nna, marai 1 asak si sum wa sai re.
