Namhpakka Majan Hta KIA Maga Marai 28 Share Shagan Nna Marai 53 Hkala Hkrum
Sinat Laknak Machyu Pala Alaw Lam Padang Dip
Namhpakka Myen hpyen dap hpe htim gasat zing madu ai hta, KIA dap maga marai 28 share shagan hkrat sum mat nna, marai 53 hkala hkrum wa ai lam, KIA Dapba 6 magam gun ni kaw na chye lu ai.
Namhpakka Myen hpyen dap hpe December 29 ya shani kaw na htim gasat hpang wa ai gaw, nhtoi 27 ya na ai hpang, January 24 ya shana maga hkying 4 daram hta yawng hkra zep zi htim gasat zing madu kau lu sai rai nga ai.
“Anhte maga na mung tsawm ra arang bang, n-gun dat da sai ga re marai 28 share shagan mat wa nna, marai 53 hkala hkrum wa ai, dai kaw sawng ai ni lawm ai, lagaw lata apnawng mat sai ni mung lawm ai, madung gaw nbungli bawm kaw rai nga ai,” Dapba 6 na lit nga magam gun langai KNG de tsun dan wa ai re.
Dai dap shara hpe htim gasat ai hta, KIA Dapba 4, Dapba 6, Dapba 10 the Kutkai PDF pawng hpawm dap ni htim gasat zing madu wa ai re.
Namhpakka Myen hpyen dap kaw na padang dip zing madu la lu ai laknak arung arai ni gaw, Leng kap ai amyawk gap sinat kaba 2, amyawk gap ndum sinat hpan hkum 8, Jak sinat 17, ငါးကြင်းမြီး 16, လက်ထောက် sinat 19, MA Sinat lau kaji 105, Drone 3, Jumma jak 1 hte laga hpyen lang arung arai ni re lam chye lu ai.
Ya ten Namhpakka mare kata, mare jasan jaseng ai lam ni hte Bawm jasan ai lam ni matut galaw taw nga ai re lam chye lu ai.
Dai zawn jasan jaseng magam bungli galaw ngut ai hpang, Mung shawa ni hte hkrum jahta bawng ban let KIO Uphkang hkrang sai ru jahkrat mat wa na re nga tsun ai re.
Ya ten Namhpakka mare hta mung shawa dum n ta law law hten za hkrum mat sai majaw, mung shawa yawng jawm garum madi shadaw pawn ba la na hpe Namhpakka ginra masha ni myit mada nga ai re.
