KIA woi awn ai hte PDF pawng hpawm dap ni htim gasat zing madu da ai Shwe Pyi Aye mare kaba hte Taung Tut mare ni hpe bai gasat zing madu la lu na matu Myen hpyen dap kaw na Sam Hkyeng SNA hpyen hpung ni hpe laknak htuk jaw nna, gap gasat shangun taw nga ai nga, rawt malan hpung maga tsun da ai re.
Myen hpyen dap maga Hummalin, Bamauk mare kaba na Sam Hkyeng SNA hte Pyozawhti pawng hpawm hpyen n-gun 300 daram hpe sinat laknak machyu pala htuk jaw nna htim gasat shangun taw nga ai nga PDF dap maga na lit nga ai salang langai KNG de ndai zawn tsun ai re.
“SNA Pyozawhti ni hpe laknak htuk jaw nna gasat shangun taw nga ai, Majan laja lana byin taw ai nhtoi 3 ya daram rai sai, Myen hpyendap, SNA, Pyozawhti yawng pawm na htim gasat taw ai, Nbungli hte mung wa gap garum ai,” ai nga tsun ai re.
Dai ginra hta January 27 ya shani kaw nna, majan laja lana gap gasat hkat wa ai gaw, dai ni ten du hkra gap gasat hkat taw nga nna, Myen hpyen dap maga nbungli ni hte wa gap garum taw nga ai re.
Myen hpyen dap gaw, SNA Dapba 753 hpe laknak 500 shakap ya nna, laga Pyozawhti ni hpe mung laknak 300 daram shakap da ya ngut sai lam, Sam Hkyeng hte ni nawn ai ni kaw na chye lu ai.
Ya ten Shwe Pyi Aye hte Taung Tut mare hta majan laja taw nga nna, lahkawng maga si hkala ai lam ni mung nga taw ai hpe chye lu ai.
Myen hpyen shiga dap ni hta, Shwe Pyi Aye hpe bai zing madu la lu sai lam tsun taw ai rai tim, kaja ta tut hta majan matut byin taw nga ai nga ginra masha ni tsun ai re.
Dai mare hta Myen hpyen dap maga laknak kaba nbungli ni hte wa gap bun ai majaw mung shawa nta law law hten za hkrum taw sai re.
Shwe Pyi Aye muklum kaba hpe KIA woi awn ai hte PDF pawng hpawm dap maga, 2023 ning November 21 ya shani htim gasat zing madu kau lu ai re.
