Shwegu mare hta Myen hpyen dap ni, mare kata de laknak kaba gap shadam bun ai majaw, mung shawa nkau hprawng yen taw nga ai lam chye lu ai.
November 14 ya shana kaw nna, Shwegu balik dap hta dap jung nga ai Myen hpyen dap ni gaw, mung mare masha ni nga ai mare kata de laknak kaba gap bun ai majaw, dai balik dap makau grup yin hta nga ai mung mare masha ni yawng, hprawng yen ma sai nga, dai ginra na mung shawa langai KNG shiga dap hpe ndai zawn tsun ai re.
“Hprawng yen taw nga ai, dai zawn hprawng yen ai gaw, 16 ya shana kaw na grau law wa ai, Mali hka htaw ra hkran n dai hkran yawng hprawng yen taw nga ai, ya mare kata masha n nga ai daram she rai wa sai,” nga tsun dan ai re.
Ya ten hpyen yen mung shawa ni hprawng yen taw ai shara hpe, shim lam a majaw n mai tsun shapraw ai nga ginra masha ni matut tsun ai re.
Shwegu mare hta Myen hpyen dap ni gaw, Shwegu balik dap, Yewun hpungkyi jawng, Shwe Min Tin hpungkyi jawng ni hta dap jung shara la taw nga nna, November 14 kaw na 16 ya shana du hkra shana shagu ngu na laknak kaba ni gap shadam bun wa ai nga ginra masha ni tsun ai re.
Ya ten Shwegu mare hta Wan sat dap, balik dap hta lai nna, laga asuya rung ni yawng pat da sai lam chye lu ai.
Myen hpyen dap dai zawn laknak kaba gap shadam bun ai majaw, mung shawa langai asak si sum nna, marai 6 hkala hkrum wa ai lam nga wa sai re.
