Munggu ginra hta, Kokang dap ni gaw mung mare masha yawng n ta langai, hpyen la n galaw n mai, lawk shagu de zuphpawng hkan woi galaw taw nga ai lam, ginra masha ni kaw na chye lu ai.
November 22 ya jahpawt, Munggu lawk shagu na mung mare masha ni hpe lawk salang ni hkan shaga gahkyin la nna, nta langai na hpyen la marai langai n galaw n mai mying jahpan hta la taw nga ai nga, dai ginra na mung shawa langai KNG shiga dap de tsun dan ai re.
“Kutkai Pyithutsit kaw lawm ai amu madu wa gaw, ya Kokang dap de bai gale shang na ginwang daw up bai wa galaw nga ai, Yang Phu ngu ai wa re, ya shi kaw na Jinghpaw, balawng, Miwa n-gin hka, yawng hpe hpyen la galaw na matu hkan woi zuphpawng taw nga ai,” nga tsun dan ai re.
Dai ginra hta gaw, n ta shagu ngu na Kani lu sha ai ni hkrai rai nna, ya ten Kokang dap maga de na marai 400 daram hpe rim rawng nna, kani dawn ya taw nga ai lam matut tsun dan ai.
Ndai lam hte seng na, Kokang dap gaw hpyen lahkawn ai kun? kani dawn ya ai kun? garan gin hka n chye ai nga nna mung shawa ni tsun ai re.
Munggu ginra hpe Kokang dap ni, lai wa sai November shata praw hta lu htim gasat zing la kau ai hpang, ya na zawn mung shawa yawng hpe hpyen la n galaw n mai hkan rim lahkawn taw ai mung rai nga ai.
