Mungmyit Sinli, Mungbaw Winseng ntsa, Ying La Bum kaw dap jung ai Myen hpyen dap Dapnu 99 npu na Hk.M.Y ( 567 ) dap hpe, Wunpawng Mungdan Shanglawt hpyendap KIA Dap Ba 6, Dap Dung 36 ni sa htim gap gasat ai hta Myen hpyen dap hpe gasat zing kau lu ai lam, ginra masha ni kaw nna chye lu ai.
October 19 jahpawt jau hkying 5 aten daram kaw na, Ying La Bum hpe sa htim gap gasat ai hta, shana maga de hkying 2 chyen daram hta yawng zep zi htim gasat zing kau lu sai lam, dai ginra na magam gun langai KNG shiga dap de tsun dan ai re.
“Um re, dai na maga de hkying 2 Minute 20 jan ram hta zing kau lu sai. Holicopter hte mung, Jet hte mung sa gap ai, shani ting majan laja ai,” nga tsun dan ai re.
Dai Myen hpyen dap hpe sa htim gap ai hta, Myen hpyen dap maga de na Jet Fighter nbung li hte Holicopter n bungli ni hte shani ting wa htim gap gasat wa ai lam chye lu ai.
Nbungli hte wa htim gap gasat ai hta, jahpawt hkying 10 chyen hta Lashio kaw na lung wa ai Holicopter nbungli 2 hte shawng wa gap garum nna, shana maga de hkying 2 daram aten Mandalay Tadaoo kaw na lung wa ai Jet nbungli 2 hte numdaw 3 lang bawm wa jahkrat bun kau da ai lam, matut chye lu ai.
Dai zawn shani ting gap gasat hkat ai hta, lahkawng maga si sum hkala ai lam hpe a tsawm tup hkrak n chye lu ai rai tim, shana maga daw Myen hpyen dap hpe gasat zing kau lu nna, laknak machyu pala alaw alam lu zing madu la ai lam, shawng lam magam gun ni tsun ai re.
Ying La Bum gaw, Munggu hte Muse lapran, Mungbaw Wingseng n tsa na, Bum kaba langai rai nna, dai ginra hta Hpyen masa hku na ahkyak dik ai dap shara re lam chye lu ai.
Dai dap shara gaw, Myen Miwa ga jarit, hpaga lam a matu ahkyak shatai ai dap shara rai nna, dai gap hkat ai shara de, 105 mile hte Munggu Myen hpyen dap kaw na laknak kaba ni hte gap garum wa ai re lam chye lu ai.
