Dawhpum Yang mare makau de laknak kaba gap shadam bun let shang wa ai Myen hpyen dap ni gaw, September praw 7 ya shani Pan Kawngmu hte Lungjung Yang mare na, mung shawa n ta adup hpaw nna, manu dan ai arung arai ni hpe lagu la mat wa ai lam chye lu ai.
Dai mare kahtawng lahkawng kaw na mung mare masha ni gaw, September praw 7 ya jahpawt Kunglaw kaw nna mawdaw 7 hte lung wa ai Myen hpyen hpung ni laknak kaba gap shadam bun let shang wa ai majaw, yawng hprawng yen kau da ai lam chye lu ai.
Dai zawn mung mare masha ni hprawng yen kau da ai Pan Kawngmu hte Lungjung Yang mare na mung shawa nta hte Nawku jawng ni hkan na manu dan ai arung arai hpe la mat wa ya ai nga, dai ginra na mung shawa langai KNG shiga dap de n dai zawn tsun dan ai re.
“Lungjung Yang mare de shang wa ai ten, U 10 daram rim hpai mat ma ai, Shat gawk na jum sau ni du hkra hta mat ma ai, Pan Kawngmu de bai du ai ten hta mung, alu sutdek hte mung shawa n ta nkau hkan na sutdek ni bai adup hpaw ma ai, manu dan ai rai hte htunghking hpun palawng ni hpe la mat ai ga rai nga ai.” nga tsun dan ai re.
Myen hpyen hpung ni gaw shana hkying 6 daram du hkra mare kata na mung shawa n ta shagu ngu na hpe shang chying lau kau da nna, Dawhpum Yang Myen hpyen dap HK.L.Y 142 dap de bai shang mat ai lam chye lu ai.
Dai mare kahtawng na mung mare masha ni gaw, Myen hpyen dap ni yawng pru mat wa ai hpang, mare de bai shang wa ai ten dai zawn azing ayang amya kau da ya ai lam chye lu ai.
Dai Myen hpyen hpung ni gaw, September praw 6 ya shana Kunglaw mare kaw na pru wa ai Myen hpyen hpung ni rai nna, lam lapran shara mi hta hkap gap hkrum wa nna, hpang shani Dawhpum Yang de du shang wa ai rai nga ai.
