Hpakant, Sengtawng ninghtawn, Seng Awng mare hta Myihprap wan transformer n tsa wan sumri wa lung lagu ai kani ya langai, wan dat ka ba hkrum nna, dai shara hta nan si mara taw ai lam ginra masha ni tsun ai.
September praw 2 ya shana hkying 9 daram aten, wan sa taw nga ai, transformer n tsa de lung nna, wan sumri wa lagu raw taw nga ai ten dat – light nna, dai shara hta nan si mara taw ai nga, Seng Awng ginra masha langai KNG shiga hpe tsun ai re.
Si mat ai wa gaw asak 28 ning daram re Swe Nyeing ngu ai wa re lam chye lu ai.
Dai shara hta lai wa sai ten ni hta mung wan sumri, hka mawtar lagu hkrum ai lam jahkring hkring byin nga ai lam, Hpakant ginra masha langai n dai zawn matut tsun dan da ai re.
“Kani ya ni hpe n dang sai. mu mamu yawng lagu ai. n ta shing du hka pung kaba hka chyup jak yawng hpa nan n ngam ai.” nga matut tsun dan ai re.
Hpakant ginra hta, Kani nanghpam lu sha ai masha lani hte lani grau grau law jat wa nna, Sengke, Phone, Lungseng yu dat wan, lagu hkrum ai lam ni jahkring hkring byin nga ai lam Hpakant ginra masha ni matut tsun dan ai re.
Hpakant Mashi Kahtawng hta, August 31 ya shani kani lu sha ai masha shada da ga law hkat ai kaw na, asak 40 ning daram re Slg Gum Ja n htu hte galun sat hkrum wa sai re.
