Mogaung, Phochit Kung lawk na, Zinyaw Jak sau seng lahkawng hpe September praw 3 ya shana, Myen hpyen dap ni Buduza hte ganaw jahten kau ya nna, sau seng magam gun marai 20 jan hpe mung rim woi mat wa ai lam, chye lu ai.
Myen hpyen dap gaw, Zinyaw jaksau seng madu Slg Moe Kyaw hte Daw Hkin Ma Shwe yan la hpe, PDF hte matut mahkai ai mara shangun nna, ya na zawn galaw ai re lam chye lu ai.
“Myen hpyen dap ni PDF hte matut mahkai garum ningtum jaw ai ngu n tsen ai hte rim ai ga rai nga ai, nta madu wa gaw shiga jau na nna, hprawng lawt mat ai, nta kaw sa manam ai asak kaba sai dinggai langai hpe rim woi mat ai. dai kaw nga ai seng magam gun yawng hpe mung rim woi mat ai ga rai nga ai.” nga nna ginra masha langia tsun da ai re.
Slg Moe Kyaw madu ai, Myitkyina – Mogaung – Hpakant lam na sau seng lahkawng hta lai wa sai September praw 2 ya shana, sa shang rim jep wa ai hta, n ta madu Slg Moe Kyaw gaw, hprawng lawt mat nna, n ta hta sa manam ai ding gai langai hpe rim woi mat ai rai nga ai.
Nta kaw sa jep rim mat ai wa ai hpang shani sau seng lahkawng hpe sa kanaw jahten kau ya ai re lam chye lu ai.
Myen hpyen dap Mogaung muklum hta n dai laman shan hte n tsen n hten ai mung mare masha ni hpe rim ahkyak la ai lam ding yang galaw nga ai rai nna, ya ten mara kata mung mare masha 100 hkawt hpe rim jep taw nga ai re.
