Wabaw Tang Gun hpe Zingri sat kau ai majaw, Myen hpyendap gumhpraw sen 5 shaw jaw

Myen hpyen dap zingri sat kau ai Wabaw Tang Gun a n ta masha ni hpe Myen hpyen dap ni gumhpraw sen 5 jaw dat nna, moi mang hpe gaw n jaw ai lam ginra masha ni kaw nna chye lu ai.

Lai wa sai August 19 ya shana, Mogaung sinpraw maga, Pyaw len mare na Salang Wabaw Tang Gun hkan Nu wa ni marai 3 hpe, Myen hpyen dap Hk.L.Y (74) dap de rim woi mat ai re.

Dai rim woi mat ai hpang, Myen hpyen dap san jep shara hta, zingri shalai kau nna, August 25 ya shana, n sa sa chyat wa ai majaw, Myitkyina de htaw lung wa ai ten, dai lam lapran kaw sha n sa hti si mat ai lam chye lu ai.

Dai zawn nsa hti si mat ai hpang, madu jan kasha yan hpe August 27 ya jahpawt Mogaung kaw nna Myitkyina dingdung daw Myen hpyen dap M.P.Hk de woi lung wa nna, si taw ai moi mang hpe sha wa woi madun na, dai shani jang Mogaung de bai woi yu mat ai lam dai ginra na buga masha langai KNG de n dai zawn tsun dan ai re.

“Tai tsit se yung (တိုင်းစစ်ဆေးရုံး) kaw, nnga mat sai lam, si mat sai lam, dai yehke taik (ရေခဲတိုက်)  kaw wa madun ai, shan nu dai kaw wa yu, wa woi jahkrum ngut nna Mogaung de bai woi hkrat wa ma ai, woi hkrat wa na (74) hpyen dap kaw bai wa da. Dai kaw tawn da na salang ni hpe bai shaga, mare salang ni sa woi la ma ai. dai shaloi gumhpraw sen 5 jaw dat ma ai.” nga tsun dan ai re.

Myen hpyen dap ni rim woi mat ai shan nu wa ni masum kaw na, ngam ai madu jan hte kasha yan hpe dai shani bai dat dat ya ai rai nga ai.

Dai madu jan kasha yan hpe dat dat ya ai shani hta, Myen hpyen dap Hk.L.Y (74) na dap up Dukaba wa nan kyuhpyi hpawng galaw na matu nga nna gumhpraw sen 5 shaw jaw dat ai lam chye lu ai.

Myen hpyen dap ni zingri sat kau ai Salang Wabaw Tang Gun a moi mang hpe buga ginra masha ni kaw na ladat amyu myu hte hpyi yu ai rai tim, n jaw ai hte, shan hte hku na sha nat lup makoi kau sai lam tsun shana wa ai re hpe chye lu ai.

Lai wa sai August 19 ya shani Mogaung lahta tsang jawng hta jawng ma sa tau ai Myen hpyen mawdaw gap hkrum ai hta, Myen hpyen la marai 2 si wa ai hpang, Myen hpyen dap ni shan hte n tsen n hten ai mung mare masha ni hpe hkan rim jep hkawm wa ai hta, dai hkan nu wa ni rim hkrum wa ai rai nga ai.