Muse, deng 105 kaw nna Lashio de yu wa ai lam kaba Asia World gate makau hta, dai ni August 29 ya shani ga-ang hkying 2 chyen daram hta, Lung Htang Pyithutsit hte Myen hpyen dap ni shada gap hkat ai majaw, marai 4 si hkrum wa ai lam, ginra masha ni kaw nna chye lu ai.
Lung Htang Pyithutsit hpung ni hpe Myen hpyen dap ni shada ga law hkat ai kaw na, gap sat hkat ai re lam dai ginra na mung shawa langai KNG shiga dap de tsun dan ai re.
“shan hte shada ga law hkat na gap hkat ai ga rai nga ai. dai ni dai makau kaw Shanglawt hte Myen hpyen dap ni gap hkat ai lam gaw nga ai le. Dai de hpyen n gun garum hpyi wa ai majaw, gap hkat ai kun gaw n chye ai. nkau tsun ai gaw dai na majaw re mung nga, gara hku re kun.” Nga tsun dan ai re.
Myen hpyen dap hte Pyithutsit dap shada gap hkat ai hta, Myen hpyen dap maga marai 2 si nna, Lung Htang Pyithutsit maga marai 2 si hkrum wa ai re lam chye lu ai.
Dai ni August 29 ya jahpawt hkying 10 daram aten, Nam – Um mare shingdu KIA Dung 9 ni nga Bakngwi Bum maga de Myen hpyen dap ni htu shadut lung wa ai majaw KIA hte Myen hpyen dap lapran majan gap gasat hkat wa ai hpang, ya na zawn Myen hpyen dap shada gap hkat wa ai rai nga ai.
Ya ten dai ginra hta Myen hpyen dap hte KIA, TNLA dap ni majan laja lana matut gap gasat hkat taw ding yang re lam chye lu ai.
