Wunpawng Mungdan Shanglawt Hpung KIO, Ginjaw Mungchying uphkang rung kaw na, Mungchying mung shawa yawng hpe, sadi jaw n dau laika langai, August 28 n htoi hte ndau shana dat ai lam chye lu ai.
Dai n dau laika hta, ya ten Myen mungdan ting gasat gala majan byin nga sai hta Myen hpyen dap gaw lam shagu hta ram ram ginchyum chyat wa nna, moi lai sai ten na zawn, mung shawa ni hpe Paw Ta rim woi n htawm, majan man de hpyen makawp ninggang shatai rim woi hkawm ai lam ni nga ai majaw, mungchying mung shawa yawng sadi na lam tsun da ai re.
Bai nna, amyusha shada gap hkala hkra ai hte hkrun lam lapran kaw Hkam Bawm kapaw la ai mabyin ni n nga u ga. Tai HPyen shamu shamawt ai ginra na mung shawa ni yawng sadi maja let hkawm sa na matu, matut sadi jaw da ai hpe mu lu ai re.
Lai wa sai August 17 ya shani Mogaung kaw na Hpakant lam maga de lung wa ai Myen hpyen hpung ni gaw, shan hte lung wa ai lam ding yang hta, mung mare masha ni hpe hkan rim gahkyin la nna, shawng lam hkawm sa ai hta, hpyen ninggang shatai woi hkawm wa sai re.
