Munyin Balik dap hpe PDF ni laknak kaba sa gap bang ya ai lam nga ai hpe ginra masha ni kaw na chye lu ai.
Daina hkying 3 jan ram kaw PDF marai 2 Muklum Balik dap de RPG sinat gap bang dat ai lam myi chyaw mu ai ginra masha langai KNG de tsun ai.
A Shoi Tsu lawk kaw nga ai Lu Ye Chum ngu ai jawng shawng kaw na Cycle hte marai 2 re. 3 lang tup sa gap bang dat ai. Nsen grai ngoi ai re. Makau kaw nga ai ni pyi kajawng mat ai re” nga na tsun ai.
Balik dap kata byin ai re majaw, si hkala ai lam hkrak n chye shi ai hpe matut na tsun ai.
Munyin myo kaw ya na zawn laknak gap kapaw ai lam ni nnga ai raitim, KIA hte PDF ni nga ai Mu Nyin sinpraw hkran N Koi Kahtawng kaw jahkring hkring laknak gap kapaw ai lam ni nga ai hpe chye lu ai.
Munyin gaw Myen hpyen gumshem dap ni Mungdan daru magam zingla kau ai hpang 2021 ning, November shata kaw myen hpyenla 1 gap sat hkrum ai lam hte March shata 27 ya shani Myen hpyen dap a Ts.Y.Hp Hpyen Du 1 hpe K-PDF ni gap sat kau ai mabyin ni nga wa ai re.
Baina Munyin mare gaw Myen hpyen dap ni kawn June 8 ya shani hte shana pru hkawmsa lam pat da ai marshall law aming shapraw da ai re lam chye lu ai.
