Hummalin hte Sezin lapran SNA ni dap jung na nga ai Taung Oo mare hpe KIA hte Pawng hpawm maga October 22 ya shana hkying 5:30 pm kaw zep zi zing madu kau lu sai lam, shawng lam hpyen magam gun ni tsun shana wa ai re.
Tawng Oo mare gaw, Hummalin hte Sezin lapran kaw nga ai mare rai nna, Sezin hte deng 12 daram tsan ai Sam Hkyeng ni na mare dingsa re lam chye lu ai.
Dai mare hpe htim gasat ai hta AD Van Mawdaw 2, Jak sinat hte kaga laknak arung arai hpan hkum ni gasat zing madu la lu wa ai nga, dai ginra na magam gun langai KNG shiga de ndai zawn tsun dan wa ai re.
“𝑯𝒖𝒎𝒎𝒂𝒍𝒊𝒏 𝒉𝒕𝒆 𝑺𝒆𝒛𝒊𝒏 𝒍𝒂𝒑𝒓𝒂𝒏 𝒏𝒂 𝑺𝒂𝒎 𝒉𝒌𝒚𝒆𝒏𝒈 𝒎𝒂𝒓𝒆 𝒅𝒊𝒏𝒈𝒔𝒂 𝑻𝒂𝒖𝒏𝒈 𝑶𝒐 𝒎𝒂𝒓𝒆 𝒉𝒑𝒆 𝒎𝒂𝒏𝒂 𝒉𝒌𝒚𝒊𝒏𝒈 𝒎𝒂𝒏𝒈𝒂 𝒄𝒉𝒚𝒆𝒏 𝒓𝒂𝒎 𝒉𝒕𝒂 𝒛𝒆𝒑 𝒛𝒊 𝒉𝒕𝒊𝒎 𝒈𝒂𝒔𝒂𝒕 𝒛𝒊𝒏𝒈 𝒌𝒂𝒖 𝒍𝒖 𝒔𝒂𝒊. 𝒅𝒂𝒊 𝒔𝒉𝒂𝒓𝒂 𝒉𝒕𝒊𝒎 𝒈𝒂𝒔𝒂𝒕 𝒂𝒊 𝒉𝒕𝒂 𝑨𝑫 𝑽𝒂𝒏 𝑴𝒂𝒘𝒅𝒂𝒘 2, 𝑱𝒂𝒌 𝒔𝒊𝒏𝒂𝒕 𝒉𝒕𝒆 𝒌𝒂𝒈𝒂 𝒍𝒂𝒌𝒏𝒂𝒌 𝒂𝒓𝒖𝒏𝒈 𝒂𝒓𝒂𝒊 𝒉𝒑𝒂𝒏 𝒉𝒌𝒖𝒎 𝒏𝒊 𝒎𝒂 𝒑𝒂𝒅𝒂𝒏𝒈 𝒅𝒊𝒑 𝒛𝒊𝒏𝒈 𝒍𝒂 𝒍𝒖 𝒂𝒊,” nga tsun ai re.
Ya gasat zing kau lu ai Taung Oo mare gaw Sezin hte deng 12 daram tsan ai shara rai nna, Myen hpyen uphkang hkrang kaw Hummalin ginwang kata lawm ai mare langai re lam chye lu ai.
Uru hka lam hku na lai yu wa yang, Taung Oo mare lai ai hpang Yepawmi ( ရေပေါ်မီး ) Tezalauk (သဲဇလောက်) mare ni du ai rai nga ai.
Dai ginra ni gaw Sam Hkyeng SNA dap ni up madu ai ginra re lam chye lu ai.
Taung Oo hpyen man maga de hpyen masa shaja hkat taw ai n htoi shata 3/4 daram du sai lam chye lu ai.
Ya hpyen masa shaja hkat taw ai shara ni gaw, Taung Oo hpyen man hte Lung Tung hpyen man maga ni de hpyen masa shaja hkat taw ai lam chye lu ai.
