Sut Nhprang htu shaw ai lam yawm wa na matu MMWN Ningmu Jahpaw Hpawng Lamang Galaw
Myen Mungdan kata Sut Nhprang htu shaw ai lam yawm wa na hpe yaw shada let, Myanmar Mining Watch Network MMWN wuhpung ni woi awn let, April 25 ya shani Chiangmai Muklum kaw hpawng lamang langai galaw wa ai hpe chye lu ai.
Ndai hpawng lamang hta Chiangmai kaw nga ai Myen Mung, Thai kaw nga ai CSO wuhpung ni sa du shang lawm bawngban wa ai hpe chye lu ai.
Ndai hpawng lamang galaw byin ai lam hte seng na, , Myanmar Mining Watch Network MMWN na Coordinator Paul gaw, KNG Shiga de n dai zawn tsun dan da ai re.
“Grau na gaw, anhte Myen mung kaw Mungdan n pyaw wa ai the rau, Sut Nhprang htu ai lam ni mung grau law wa ai majaw, dai hpe anhte ni yawm wa hkra gara hku jawm galaw mai ai ngu hpe ningmu jahpaw na, jawm galaw ai lamang re,” nga tsun dan ai.
Myen mung dan kata hta Myen Hpyen dap daru magam zing kau ai hpang, laknak lang rawt malan hpung ni lamu ga grau maden jat wa lu ai hte rau, Sut nhprang htu shaw ai lam ni mung grau grau law wa ai hpe mu lu ai re.
Myen mungdan kata sut nhprang htu shaw ai lam hpe shayawm lu na yaw shada let, Myen mung kaw nga ai CSO Wuhpung 12 pawng na jawm hpaw gahkyin da ai, , Myanmar Mining Watch Network MMWN wuhpung rai nga ai.
