Mai Nawng the Mamung Kai Mare lapran Gasat Gala Majan Byin

Nawnglut Ginwang Indawgyi ginra Mai Nawng Mare hte MaMung Kai mare  lapran Myen Hpyen dap, Sam Hkyeng SNA dap ni hte Wunpawng Mungdan Shanglawt Hpyendap KIA woi awn ai PDF dap ni , laja lana gap gasat hkat taw nga ai lam ginra masha ni kaw na chye lu ai.

KIA hte Pawng HPawm dap ni htim gasat zing madu da ai Mamung Kai Mare de Sam HKyeng SNA dap ni htu shadut wa ai majaw, lai wa sai lahkawng Masum ya ram kaw na majan byin taw nga ai re lam chye lu ai.

“ Bat langai ya shani kaw na grai bai gap gasat hkat wa ai, ndai kalang gaw, KIA gasat zing da ai Mamung Kai de Sam Hkyeng SNA ni htu lung wa na gasat poi byin ai masa lam re, anhte maga na ni htim gasat ai lam hpa n nga ai,” KIA magam gun hte ni nawn ai ni tsun ai re.

Sam Hkyeng SNA Dap
Sam Hkyeng SNA Dap

Ya ten KIA the Pawng hpawm dap ni gaw, Mamung Kai Mare hkran maga de dap jung shara la tawn nna, Myen Hpyen dap the SNA ni gaw, Mai Nawng mare maga de dap jung da nna, Mamung Kai Mare maga de htu shadut htim gasat ai lam galaw taw ai re.

Dai ginra hta July 14 ya jahpawt Sam Hkyeng SNA hte Myen Hpyen dap ni hpyen n-gun kaba the ma ja shang wa na shang htim gasat zing kau ai rai nga ai.

Dai hpang KIA hte Pawng Hpawm dap ni, Mai Nawng hte Mamung Kai mare hpe August 16 ya jahpawt bai htim gasat ai hta, Mamung Kai mare hpe gaw gasat zing madu la lu wa ai rai tim, Mai Nawng mare hta gaw, Mung Shawa law law hpe SNA dap ni Hpyen ninggang shatai da ai majaw, gasat zing la na matu yak hkak wa ai re.

Lai wa sai Shata, Mai nawng hte Mamung Kai mare hpe KIA the pawng hpawm dap ni htim gasat wa ai ten, Sam Hkyeng SNA dap ni mung shawa ni hpe hpyen ninggang shatai rim woi da ai majaw, Mai Nawng Mare hpe n gasat zing ai sha ngam kau da mare kaba mung rai nga ai re.

Dai ginra na mung shawa yawng gaw, July 14 ya jahpawt Sam Hkyeng ni ma ja htu gasat shang wa ai majaw, Mare masha yawng, dai jahpawt yawng hprawng yen ma ai re lam chye lu ai.

Dai ginra na hpyen yen mung shawa n kau gaw, ya ten Nam maling kata hprawng koi yen ai ni nga ai zawn, Tamahkan, Mogaung, Monyin, Chaung Wa mare ni de hprawng yen ai lam chye lu ai.

Exit mobile version