Mungmyit Sinli Kutkai Kawng Hka mare kaba na Myen Bukda ni a lamu ga hte Mare buga masha ni a lamu ga shara nihpe, dai kaw nga ai KIO lit nga ai Salang ni zing la nna, htingra gayet dut sha taw nga ai lam ginra masha ni tsun dan wa ai re.
Kawng Hka mare Daw (2) maga na Myen Budda hpu nau ni a lamu ga hte Daw (4) maga na Sun wang lamu ga nkau hpe dai kaw nga ai KIO Salang ni buga gaw sharawt masing ngu ai gabaw hte zing madu da nna, tinang dinghkrai dum nta wang ni gaw gap la taw nga nna, nkau lamu ga ni hpe htingra gayet dut taw nga ai nga, Kawng Hka ginra masha langai KNG shiga dap de tsun dan wa ai re.
“Shawng ningnan mare kata na Budda hpu nau ni a lamu ga hpe shawng zing kau ai, ngut na gaw Dukaba, Salang Kaba ni htingra gayet shadawn na bai garan la ma ai, dai garan la ai shara kaw ya gaw dum n ta ni gaw gap taw sai, ngut na mung laga shara ni hpe gau ngwi ngwi Backhold hte hkan kanaw na zing la taw nga ai, Mi lawk 4 maga kaw na ya lawk 1 maga de du wa sai,” nga tsun ai re.
Dai ginra na lamu ga ni hpe KIO lit nga ai Salang n kau buga gaw sharawt gabaw hte hkan zing madu la taw nga ai gaw ya ten du hkra rai yang mung shawa htinggaw (10) jan na sun lamu ga ni hpe zing la kau sai nga tsun ai re.
Ya na zawn mung shawa ni a myit hkrum lam n lu ai, lamu ga ni hpe zing ai gaw n byin ging ai lam re nga, Kawng Hka ginra masha langai ndai zawn matut tsun da ai re.
“Tsun ai gaw buga gaw sharawt masing a matu re nga tsun ai, hpa gaw sharawt masing mi rai rai Asuya langai hku na galaw ging galaw ang ai ni hpe buga ginra masha ni hte a tsawm bawng ban nna, ang ai lamu ga manu ni hpe a tsawm jaw rai na, yawng a myit hkrum lam la na galaw shangun mayu ai, ya gaw gadai hpe mung atsawm bawngban jahkrup ai lam n nga na, tsun yang gaw အာဏာရှင် hpe gasat ai nga, tinang nan bai အာဏာရှင် byin taw ai gaw, grai n hkrak ai,” nga tsun ai re.
Dai lamu ga shara gaw, Kawng Hka mare kaw na, Loi Hkang de sa wa ai lam kaba makau hta nga ai lamu ga rai nna, hpaga lam hta mung htuk manu ai shara ni re lam chye lu ai.
Kawng Hka mare hta KIO Salang kaba ni hku na ya na zawn lamu ga jahten zing madu ai lam hpe lawan litla hparan ya na matu KIO Dingda Ginwang Ginjaw de mung laika bang hpyi shawn da ai rai tim, ya du hkra lit la hparan ya ai lam n nga shi ai re.
Ndai lam hte seng na KIO Shiga magam dap lit hkam Dukaba Nhpang Naw Bu hpe san yu yang, KIO ginjaw kaw na matsun da ai lam, ahkang jaw da ai lam hpa n nga ai nga n dai zawn tsun ai re.
KIO Ginjaw kaw na gaw dai zawn re ahkang ni hpe mung n jaw da ai, Kawng Hka mare kaw gaw KIO ni hkrai uphkang ai ma n re ai, KDA na masha kaba ni hte pawng na jawm uphkang ai shara re, dai majaw gaw lama mang hkang byin wa ai rai yang, dai kaw na Uphkang Komiti Salang ni hparan na ra ai,” nga tsun ai re.
Mungmyit Sinli ga hta amyu sha myit hkrum lam hta Pangdung langai, matsun langai n pu hta rau jawm gawde sa wa na ngu ai masa kata hta, dai ginra yawng KIO uphkang sai-ru hkrang hte sa taw nga sai re.
Ya ten Mungmyit Sinli ginra hta Myusha lam yan hta grai naw woi zinlum shakut nga ra ai ten, ndai zawn n hkrum n ra re ai mabyin lam ni n nga shangun mayu ai nga, KawngHka ginra masha ni tsun ai re.
Kawnghka mare kaba gaw, Kuthkai mare hte deng 8 tsan ai shara rai nna, Lai wa sai ten, Mahtu Naw woi awn ai KDA Mung Shawa hpyen hpung ginjaw shara mung rai nga ai.
Dai mare hta nta htinggaw hkying mi jan nga ai mare kaba langai re lam chye lu ai.