Myitkyina Mare kaba hta, ndai laman, Myen hpyen dap ni mung shawa hking hking nna, hpyen n’gun 50 ram hte n ta manam jahpan hkan jep ai lam ni galaw taw nga ai nga, Myitkyina ginra masha ni tsun ai re.
Myen hpyen dap ni n dai laman Myitkyina lam numbraw shara n kau hkan mung shim lam la, hkawm sa hkawm wa ni hpe san jep ai lam hte lam kaba makau hkan na n ta ni hpe manam jahpan hkan jep ai lam galaw nga ai nga, Myitkyina ginra masha langai KNG de tsun dan wa ai re.
“Hpyen la da, mung shawa hking mada marai 50 ram the sa wa nna, manam jahpan sa jep ai re nga na sa jep ai, ya gaw, Shwe Zet Manhkring n dai myo shinggan maga de shan the yu na n tsen n hten ai n ta hkan jep ai ngu mu ai, n ta shagu mung gaw bai njep ai, lam kaba makau hkan na n ta yawng hpe jep mat ai,” nga tsun dan wa ai re.
Tinang htinggaw mying jahpan rawng ai n ta hta lai na, laga gadai jinghku nta sa yup ai rai tim, manam jahpan tang madun ra na re lam mung tsun mat wa ai hpe chye lu ai.
Manam jahpan n bang na lama jep rim hkrum ai rai yang, gumhpraw dam mun mi the htawng dam Shata masum jahkrat mai ai lam, Myen hpyen dap tsun ndau da ai re.
Lama na jep rim hkrum ai rai yang, amu manghkang n kam shuk ai mung shawa n kau gaw, Myen hpyen dap hte balik ni hpe mayun kumhpa jaw nna shangut kau ai lam ni mung law law taw ai lam chye lu ai.
Myen hpyen dap daru magam zing kau ai hpang, Myen mungdan ting hta, manam jahpan tang madun ra na lam the seng ai Upade shapraw dat ai mung rai nga ai.
Ndai Upade hpe lai wa sai English ni up ai ten kaw na galaw wa ai lam hpe 2012 ning Thein Tseing lakhtak hta dawm jahkring kau ai hpang, Myen hpyen dap daru magam zing ai hpang bai asak jahkrung dat ai rai nga ai.
Mung masa n pyaw ai ten, manam jahpan tang madun ai lam gaw kaja dik re lam Myitkyina ginra masha langai mung matut tsun dan da ai re.
“ Manam jahpan hpe tinang dum nta hta lai na laga shara gadai kaw mi sa yup tim, hkang hpyi ra ai, n dai ten mung masa grai n pyaw ai majaw gaw, grai wa lit li ai bungli n re majaw, gaw, Manam jahpan tang madun yang kaja ai, n rai yang byin yang n loi ai.” Nga matut tsun madi madun da ai re.
Myen mung lawu ga de gaw, dai zawn manam jahpan hkan jep ai zawn rai nna, hpyen lahkawn la ai lam ni mung galaw taw nga ai hpe chye lu ai.
