Manmaw Myen hpyen dap Hk.L.Y (236) hpe KIA hte Pawng hpawm dap maga na Padang dip Zing Madu
Manmaw Myen hpyen dap Hk.L.Y (236) dap shara hpe dai hpawt manap hkying 8 ten daram hta yawng zep zi htim gasat zing madu la lu sai nga, Dukba Nhpang Naw Bu tsun ai re.
“Manmaw Hk.L.Y (236) dap hpe dai hpawt yawng zep zi zing la lu sai” nga KNG de tsun shateng wa ai re.
Ya htim gasat zing lu sai Hk.L.Y (236) dap shara gaw, Manmaw Myen hpyen dap daju Ts.K.Hk (21) dap the n tsan ai shara rai nna, Ts.K.Hk (21) hpe madung shim lam la da ya ai dap shara mung rai nga ai.
Ya Matut nna mung Ts.K.Hk (21) hte Manmaw Dakkasu jawng hte အမတ (၃၆၆) makau hkan majan laja lana naw matut byin nga ai lam matut tsun dan wa ai re.
Myen hpyen dap maga na, Mung shawa Wundek nta hkan shara la nna, Sniper, Jak sinat ni the ning hkap shingla gasat ai lam ni galaw taw nga ai re.
Ts.K.Hk (21) hta rawng nga ai Myen hpyen hpung ni hpe madung n bungli hku na sha, lusha sa jahkrat jaw taw sai rai nna, Manmaw grup yin yawng hpe pawng hpawm dap maga wang shinggrup da lu sai masa mung rai nga ai.
Ndai laman Manmaw Myen hpyen dap shara ni hpe laja lana htim gasat nga ai hta, 366 Myawk dap hpe February 18 ya shana zing la lu nna, Hk.L.Y 236 dap hpe gaw, dai hpawt February 20 ya jahpawt hkying 8 ten hta, yawng zep zi zing la lu sai mung rai nga ai.
ခလရ (၂၃၆) hpe lu zing ngut ai hpang, hkying 10 ten daram kaw na Myen hpyen ni nbungli hte laja lana bai wa gap sharu bun wa ai nga shawng lam hpyen magam gun ni tsun ai re.
Manmaw Myen hpyen dap Hk.L.Y (236) hte အမတ (၃၆၆) hte လိပ်ပြာကုန်း shara ni hpe gasat zing la lu sai majaw, Ts.K.Hk(21) gaw n yak na sai nga na, shawng lam hpyen magam gun langai KNG de ndai zawn matut tsun maram tawn ai re.
“Ts.K.Hk (21) hpe madung shim lam la ya nga ai Hk.L.Y (236) hte အမတ (၃၆၆) hte လိပ်ပြာကုန်း ni hpe la kau lu jang gaw, Ts.K.Hk (21) htim na matu loi na sai,” nga tsun dan wa ai re.
Pawng hpawm dap maga na Manmaw Myen hpyen dap zing da lu sai shara ni gaw, Hk.L.Y 236, Tank mawdaw daw, Myawk dap, Hpri gang dap, ni hpe zing madu la lu sai re.
Ya Manmaw kaw naw matut ngam ai Myen hpyen dap 10 daram naw ngam ai rai nna, dai dap mying ni gaw, Tsi dap, Gaw Gap dap dung (ဆောက်လုပ်ရေးတပ်) ၊ Myawk dap (ဒုံးတပ်) ၊ Dap Jau Dapdung (ထောက်ပို့ တပ်) ၊ ဆက်သွယ်ရေးတပ်၊Enginneer Dap၊ Shaman Shakyang dap(လေ့ကျင့်ရေးတပ်), Hk.L.Y 47 dap hte Manmaw Dakkasu jawng kaw wa dap jung nga ai dapnu 88 hte laga dap shara 10 ram naw nga ai re.
Dai dap shara hkan na Myen hpyen magam gun law malawng gaw, Ts.K.Hk(21) kaw yawng wa gahkyin nga ai majaw, hpyen n-gun 1000 daram naw ngam rawng taw na masa nga ai lam, hpyen masa yu maram ai ni tsun da ai re.
Ya matut nna, mung Ts.K.Hk 21 dap shara hpe pawng hpawm dap maga na laja lana matut htim gasat nga ai zawn, Myen hpyen dap maga na mung, Manmaw mare kaba hpe n tat sum kau hkra nbungli Drone, laknak kaba hpan hkum hte ninghkap shingla gasat taw nga ai re.
