Dawhpum Yang Ginra hta Nbungli Bawm wa jahkrat ai majaw, nta langai na sha marai 7 si ai hta, Ma kaji 3 lawm
Dawhpum Yang ginra hta Myen hpyen dap nbungi bawm wa jahkrat bun ai majaw, nta langai na sha marai 7 si hkrum wa nna, marai 5 hkala hkrum wa ai re.
February 19 ya jahpawt manap jau hkying 1:25 the 1:30 lapran Dawhpum Yang Ginwang na sam mare rai nga ai, Wa Ngan hte Nang i mare hta bawm wa jahkrat bun ai majaw, Ma kaji marai 3 hte hpawn nta langai na sha marai 7 asak si hkrum wa nna, marai 5 hkala sawng wa ai re.
Dai hpawt maga hkying 1:25 Am ten hta Wa Ngang mare kaw wa jahkrat bun ai hta Slg Maung Oo hte Jan Aik Sau yan nu wa ni a dum n’ta hta wa hkrat ang ai majaw, dai nta na marai 7 hte si hkrum wa ai lam, dai ginra hte matut mahkai nga ai Salang langai KNG de tsun dan wa ai re.
“Dawhpum Yang ginra ngu ai baw rai nga ai, Wa Ngang mare hte Nang i mare shara lahkawng kaw bawm wa jahkrat bun wa ai, Wa Ngang mare kaw wa hkrat ai gaw nta langai na sha marai 7 si ai, Nang I mare kaw wa hkrat ai bai rai jang gaw marai 5 hkala ai ga rai nga ai,” nga tsun dan wa ai re.
Dawhpum Yang, Tsanlun Ninghtawn Wa Ngang mare kaw wa hkrat ai hta si sum ai ni gaw, Asak 53 ning re n’ta madu Salang Maung Oo, asak 56 ning n’ta madu jan Aik Sau, Kasha Salang Sai Leng asak 25 ning, Kanam Jan Cherry Htwi asak 22 ning, Kashu Shd Awng Lin Htet asak 9 ning, Kasha ni rai nga ai, Yun Mi Mi Sar asak 10 ning, Shy Ka Lia asak 3 ning, ni hkrum wa ai re.
Nang I mare bawm wa jahkrat hkrum ai hta, marai 5 hkala hkrum wa na, dai hkala hkrum ai ni gaw, Slg Win Naing, Daw Hkin Yi, Daw Win Chyai, Shd Kaung Htet Lwin, Jan Su Hlaing ni hkala hkrum wa ai re.
Dai ginra ni hta lai wa sai 2024 ning March Shata Dawhpum Yang ginra yawng hpe KIA htim gasat zing madu kau ai hpang, dai ginra hta majan byin ai lam hpa n nga sai re.
Maga mi de, Manmaw majan laja lana gap gasat hkat taw nga ai ten, Myen hpyen dap maga na nbungli hte laja lana wa gap sharu bun taw nga ai re.
