Hugawng Lido lam kaba n tsa na Wara Zup mare hpe Myen hpyen dap nbungli bawm jahkrat bun ai majaw, mung shawa langai si nna, dum nta 3 wan hkru hten wa ai re.
February 17 ya shana maga hkying 3 ram hta Jet nbungli langai hte bawm lahkawng jahkrat bun kau da ai lam the seng na mare masha langai KNG de ndai zawn tsun dan wa ai re.
“17 ya shana hkying 3 ten ram hta nbungli the bawm 2 mare ka-ang hte yang kaw nan jahkrat bun kau da ai, dai kaw mare masha langai si ai. Min Zay Thant shaga dat ai majaw wa jahkrat ai rai nga ai, hpyen hpe hpyen hku n gasat mung shawa ni hkrai nga ai mare kata de yaw shada lam nga nga hte galaw wa ai lam rai nga ai,” nga na tsun dan wa ai re.
Ya na zawn nbungli bawm wa jahkrat bun ai majaw, asak 27 ning re ai Shd Labya Brang Mai baw kaw bawm hkyep hkra na, dai shara hta nan si mat nna, dum nta masum mung wan hkru hten hkrum wa ai re.
Myen hpye dap sa jahkrat bun ai nbungli bawm 2 gaw, hpaji jawng shingdu maga de wa hkrat ang ai hta ya na zawn hkra hten ai lam mung rai nga ai.
Mare masha langai bai tsun dan ai gaw, Myen hpyen dap ni hpaji jawng hpe shading na wa jahkrat ai rai tim, jawng wang kaw n ang ai sha, jawng wang shingdu maga wa hkrat ang ai majaw sha si hkala yawm wa ai lam ndai zawn matut tsun dan tawn ai re.
“Mana de na mabyin hpe yu yang gaw hpaji jawng hpe wa shading sha-ang na jahkrat ai re ngu maram lu ai, shan the jahkrat mat ai hpe yu yang hpaji jawng hpe lai kau da nna, hpaji jawng shingdu de wa ang mat ai, dai majaw sha jawng ma ni hpa n ra ai rai nga ai. Bawm wa hkrat ang ai nta gaw, mare ka-ang na Laba nta kaw wa ang nna, mare ka-ang kaw nan rai nga ai, dai wa hkrat ai nta nig aw la hpa n nga hkra yawng hten ayai mat ai ga rai nga ai, Labang Naw Din nta gaw yawng malawng mat ai, Lamung Brang Nan n ta gaw wan hkru hten ai,” nga tsun ai re.
Myen hpye dap maga nbungli bawm sa jahkrat ngut ai hpang, Pyithutsit dap maga na Drone hte bawm 4 lang bai sa jahkrat bun wa ai rai tim, masha si hkala ai lam gaw n nga wa ai re.
Dai ginra hta Rawt Malan nhtoi February praw 5 ya hpang kaw na KIA dap maga shagyit jahkrat na lai sa lai wa mung shawa ni hpe san jep na hkawm sa hkawm wa lam hta aten masat ai lam ni galaw ai lam nga wa ai re.
Dai majaw, dai ginra hta Wunpawng Mungdan Shanglawt Hpyendap KIA hte Min Zay Thant Pyithutsit dap lapran hpyen masa shaja hkat nga ai n htoi 10 ya daram na wa sai re.
Ndai laman hta Min Zay Thant Pyithutsit mag ana Drone hte sa gap ai lam hte seng na ginra masha langai mung n dai zawn matut tsun dan wa ai re.
“Pyithutsit dap ni shani shagu ngu na Drone hte sa gap taw ai majaw, mare masha ni mare kaw gadai ngwi nga mat na yawng hprawng sai,” nga na tsun ai re.
Ya ten Wara Zup mare masha ni yawng tinang man-ang ai nam de hprawng yen taw nga ai re.
