Hpakant Myen hpyen dap na KIA ni zing da ai shara ni hpe bai n htang gasat na hkyen nga
Hpakant ginra de Majan byin ai lam n nga ai rai tim, Myen hpyen dap maga na nbungli bawm wa jahkrat bun ai lam ni galaw wa ai re.
Lai wa sai February 15 ya shana maga de hkying 4 daram aten hta, Hpakant Dapba 9 hte Dung 6 ginra ni de Jet Fighter nbungli 2 the bawm wa jahkrat bun wa na, nbungli kaw na Rocket ni the mung gap bun wa ai lam nga ai nga, Dukaba Naw Bu tsun ai re.
“Dapba 9 Dung 6 ginra ni de gasat gala byin ai lam hpa n nga tim nbungli bawm wa jahkrat, Rocket ni hte wa gap ai lam nga wa ai, Si hkala ai lam gaw hpa n chye lu ai, nbungli hte wa gap ai re majaw gaw, hkra hten ai gaw loi li she n nga na i? atsawm hkrak tup gaw n chye lu ai le yaw.” Nga na tsun dan wa ai re.
Hpakant ginra de n dai laman, Majan byin ai lam hpa n nga ai rai tim, Myen hpyen dap maga na ya na zawn nbungli hte bawm wa jahkrat bun wa na, Drone ni the mung ding yang kin yu yu hkawm nga ai nga, shawng lam hpyen magam gun ni tsun ai re.
Dai shani hta nbungli bawm rai n jahkrat shi yang, Hpakant Lung Hkang, Seng Ra the Ginsi mare makau grup yin ni hta Drone hte Shani ting pyen gayin hkawm nna, shana maga de nbungli bawm sa jahkrat bun wa ai lam mung rai nga ai.
Hpakant ginra hta ndai laman, Myen hpyen dap maga na Hpyen shamu shamawt wa ai lam ni grai galaw wa ai zawn, Hpakant Seng Tawng mare maga ni de mung hpyen shamu shamawt nga ai nga, shawng lam magam gun langai KNG hpe ndai zawn matut tsun ai re.
“Ngai yu maram ai hku nga yang gaw, Myen ni maga na mung တန်ပြန်စစ်ဆင်ရေး bai galaw mayu wa na, ထိုးစစ် na matu hkyen shajin wa taw nga ai ngu mu ai law, Ya gaw Myen ni kaw mung madang tsaw ai Drone ni grai hkyen, grai jai lang wa ai hpe mu mada taw ai le. majan gaw bai byin wa na masa nga ai,” nga na tsun maram da ai re.
Ya na zawn Majan byin ai lam mung n nga ai shara ni de Myen hpyen dap maga nbungli bawm sa jahkrat bun wa ai majaw, ginra masha ni myit tsang nga ma ai re.
