Pawng hpawm dap ni Zing da ai အမတ (၃၆၆) de Myen ni htu wa nna, Majan matut laja nga
Manmaw mare Pawng hpawm dap ni zing da ai (366) Myawk dap maga de Myen hpyen dap ni lagaw lam, Drone nbungli hpan hkum hte bai htu shadut wa na, majan laja taw nga ai nga Dukaba Nhpang Naw Bu KNG shiga dap de tsun dan ai re.
Manmaw masat (366) Myawk Dap hpe KIA the pawng hpawm dap maga lai wa sai February praw 2 ya shana htim gasat zing madu kau ai hpang, Myen hpyen dap maga na mung, lagaw dap, Drone, nbungli ni hte bai htu shadut wa ai majaw, dai ginra hta majan matut laja taw nga ai nga, Dukaba Nhpang Naw Bu KNG shiga dap de tsun ai re.
“Myen ni mung Ts.K.Hk 21 kaw na shan hte tat sum kau ai, အမတ (366) de lagaw dap hku na mada, Drone, Nbungli hpan hkum hte htu shadut lung wa ai, ya majan gaw ခလရ (၁၃၆) hte စကခ(၂၁) lapran the အမတ (၃၆၆) dai lapran shara ni hta majan laja taw nga ai ga rai nga ai,” nga tsun ai re.
Matut na rai tim mung Myen hpyen dap ni gaw, mung shawa Wundek nta ni hkan Banger shatai rai na ninghkap shingla gasat taw nga ai re.
Manmaw mare hpe Myen hpyen dap nbungli hte shani shagu wa gap bun ai majaw, tsa htam shadang 90 ram yawng hten mat sai nga, shawng lam hpyen magam gun hte ni nawn ai ni tsun ai re.
Ya ten Manmaw mare kaba gaw laknak kaba si ni a majaw, dum nta law law hten za hkrum taw nga sai hpe mu lu ai re.
Manmaw mare hta rawng nga ai Asuya magam gun n kau hte, Myen hpyen la law malawng Ts.k.hk 21 dap kata rawng nga nna, ninghkap shingla gasat taw nga ai zawn, KIA hte pawng hpawm dap maga na mung ngam ai shara ni hpe matut htim gasat taw nga ai hta, lahkawng maga Si hkala lam ni law taw nga ai re.
Myen hpyen dap maga na mung, Nawng Hku, Nam Hpa, Shwe Kyi Na, Pinsin Kung hte Dakkasu jawng wang shara makau grup yin ni hta shani shagu nbungli bawm jahkrat na ninghkap shingla gasat taw nga ai re.
Manmaw mare hpe htim shagrawt nga ai hta, Myen hpyen dap shara ni yawng hpe KIA maga de na wang da lu sai majaw, Myen hpyen dap ni nbungli hta lai na laga hpyen garum lam n nga sai hte, lu sha shakyet da ai masa re lam shawng lam magam gun ni tsun ai re.
Manmaw mare kaba hta Myen hpyendap 10 jan daram naw nga ai hpe chye lu ai rai nna dai dap shara ni gaw, Ts.K.Hk 21 ginjaw dap kaba, Lagaw dap ni rai nga ai Hk.L.Y 47, Hk.L.Y. 236, 641, Dapnu 88 hte laga အင်ဂျင်နီယာတပ်၊ ထောက်ပို့တပ်၊ ဆက်သွယ်ရေးတပ်၊ dap shara ni naw nga ai re.
