Laiza de Sihkam Drone wa jahkrat bun na, Sadung de nbungli bawm wa jahkrat

Majan byin ai lam n nga tim, Myen hpyen dap ni Sadung Ginra de nbungli the bawm wa jahkrat bun wa ai lam chye lu ai.

Dai na maga de hkying 2 daram ten hta Sadung ginra na Yin Hpyu Kawng de Jet nbungli langai hte bawm lahkawng wa jahkrat bun kau da ai re.

Myen hpyen dap nbungli bawm wa jahkrat bun ai majaw, mung shawa langai lagaw kaw loi mi hkra hkala ai nga ginra masha wa ndai zawn tsun dan ai re.

“Dai ni wa jahkrat ai gaw Lisu mare, Lung Htang hte Ying Naw lapran Yin Hpyu Kawng hta re, lahkawng lang jahkrat bun kau da ai, dai kaw nga ai Ma langai lagaw kaw loi katset hkra ai sha re,” nga tsun dan ai re.

Sadung ginra hpe KIA hte Pawng hpawm dap ni lai was ai June 11 ya shani htim gasat zing madu kau ai hpang dai shara yawng hta KIO Uphkang sairu hkrang the uphkang taw nga sai shara re.

Mana February 6 ya shana hkying 10:40 ten hta Myitkyina kaw na shapyen dat ai ngu maram lu ai Si hkam drone langai the, Laiza makau grup yin de bai wa jahkrat bun wa ai re.

Dai Si Hkam Drone Laiza Mung Seng Yang mare shinggan de wa hkrat ai rai nna, hkra hkala ai lam hpa n nga ai nga, ginra masha ni tsun ai re.

Manmaw majan laja taw nga ai ten, Myen hpyen dap maga na ya na zawn Sihkam Drone (Suicide Drone) hte Laiza grup yin de wa gap bun ai ndai kalang the rai yang, lahkawng lang rai sai re.

Lai wa sai January 24 ya shani hta mung Laiza Alen Bum the Laisin maga ni de wa jahkrat bun wa ai re.