Myen Hpyen dap maga KIA Ginjaw Laiza hte Laisin mare ni de wa jahkrat ai Drone laknak gaw, Suicide sihkam Drone ngu ai hpan re lam Hpyen the seng ai ni kaw na sagawn chye lu ai.
Manmaw majan laja nga nna hpri gang dap hpe tat sum kau ai shani hta Myen hpyen dap maga na Laiza hte Laisin grup yin de Sihkam Drone hpan hte bawm wa jahkrat bun wa ai re.
Dai Drone hta GPS bang na tinang sa mayu ai shara hpe a tsawm tup hkrak sa dat na, sa jahkrat ai Drone hpan re lam KIA Ginajaw hta mu gun nga ai magam gun langai KNG de tsun ai re.
“Suicide Drone re, GPS kalang dat masat na dat dat ai re, gara kaw na re gaw a tsawm tup hkrak n lu maram shi ai,” nga tsun ai re.
Myen hpyen dap maga de na Manmaw Hpri Gang dap hpe tat sum na, sum machyi lam law taw ai January 24 ya shani hta KIA ginjaw Laiza de drone 2 si hkam bawm sa jahkrat bun wa ai re.
January 24 ya Shana maga hkying 1 daram aten sa jahkrat bun wa ai hta, langai gaw Laiza Alen Bum de wa hkrat na, langai gaw Laiza Hka Chyang lawk na Myitkyina Hotel ntsa hta wa hkrat ang ai re.
Dai hpang January 25 ya shana de Laisin de bai wa jahkrat ai hta Janmai bum maga de wa hkrat na, hpang shani January 26 ya shani hta Laisin mare kaw nbungli bawm lahkawng bai wa jahkrat bun kau da ai re.
“24 ya shani Laiza kaw wa jahkrat da ai, dai hpang kru ya shani gaw Laisin de bai wa jahkrat ai, Jan Mai Bum maga de wa hkrat ai, ngut na Laban shani gaw Laisin mare kaw nbungli bawm lahkawng bai sa jahkrat kau da ai,” nga tsun ai re.
Myen hpye dap maga na Ya na zawn Si hkam Drone hte KIA Ginjaw ginra de sa jahkrat bun wa ai gaw n dai shawng ningnan lang mung rai nga ai.
Laiza Hka Chyang lawk hta wa hkrat ai Drone gaw, Myitkyina Hotel n tsa kaw wa hkrat na dai n tsa na ရေပူရေအေး Solar pa ni yawng hten ayai mat ai hpe mu lu ai re.
Myen hpyen dap maga na ndai laman Laiza Laisin ginra ni de Drone nbungli bawm wa jahkrat ai rai tim, Masha si hkala ai lam ni hpa n nga ai re hpe sagawn chye lu ai.
Ya na zawn Myen hpyen dap maga na madang tsaw ai Drone ni the KIA ginjaw shara ni de gap gasat wa ai lam gaw grau na sadi ra ai masa re lam hpyen masa yu maram ai ni tsun tawn ai re.
“Ndai hpe yu yang gaw, Kamikaze shing nrai Suicide Drone hpan re lam maram lu ai le, dai hpe yu yang Waimaw Shing nrai Myitkyina zawn re kaw na shapyen ai mai byin ai le, Deng tsawm ra mi tsan ai lu pyen ai ngu gaw grai tsang ra ai ga rai nga ai, shan hte kaw gaw madang tsaw ai hpyen lang arung arai yawng nga ai re nga yang gaw, anhte maga na grai naw sadi ra ai ga rai nga ai,” nga tsun maram tawn ai re.
Deng galu sumtsan de drone shapyen gasat lu ai lam gaw, rawt malan dap ni a matu grai tsang ra ai re lam hte matut sadi maja na matu re lam tsun madi madun da ai re.
Ndai ten Hpyen majan laja taw ai ten re majaw nbungli ngoi ai ten hta sha sadi maja ai n re sha, ya na zawn n sen grai wa n ngoi ai Drone ni jai lang wa ai majaw mung shawa yawng mung galoi ma sadi maja na nga ra ai ten re lam hpyen masa yu maram ai ni tsun sadi jaw da ai re.
