Shiga

Mungmyit Sinli hta Balawng TNLA hte KIA dap ni Manghkang Byin

Mungmyit Sinli KIA Dapba 4 Dap Dung 8 Pang Kanai Ninghtawn Mung Wi mare na KIA dap shara 2 hpe Balawng TNLA dap maga htawt sit shangun ai majaw, shada lahkawng maga lata du hkat ai lam ni nga wa ai re.

January 27 ya jahpawt hkying 9 chyen ten daram hta Mandung Ginwang Mung Wi mare na Wundan Kawng dap shara lahkawng hpe htawt sit na matu masha n gun hte sa wa ai hpe KIA dap maga na hkap hkum pat ai kaw na, shada lahkawng maga htwi hkat ai lam ni byin wa ai re.

Dai zawn htwi hkat ngut ai hpang Balawng dap ni wa mat ai hpang mare masha ni hpe wa gahkyin la na, mare masha ni hpe nhtu hpai shangun rai, KIA ninghtawn rung hpe nlung hte sa kabai ai lam ni galaw wa ai nga, ginra masha ni tsun dan wa ai re.

“Mungwi mare makau na Wundan Kawng Post KIA dap shara 2 hpe yen ya na matu dai hpawt hkying 9 kaw na hkying 11 lapran hta Balawng TNLA dap ni hpyen n gun kaba hte sa wa na atit anang sa gawt shapraw taw nga ai, dai kaw na htwi hkat kanawng hkat ai lam ni byin wa ai nga,” ginra masha langai KNG shiga de tsun dan ai re.

2023 ning 1027 majan masing ten laman hta Nam Du, Man Dung ginra ni hpe TNLA dap ni htim gasat zing madu da lu sai majaw, dai ginra hta KIA hking hte rai na nga n mai hkawm sa n mai ai nga na balawng dap maga na hkum pat taw ai re.

Lai wa sai January 12 ya shani hta mung Mungmyit hte Mandung lapran na KIA shagyit hpe  TNLA dap maga de na yen ya na matu sa tsun ai majaw shada gali galaw hkat ai lam ni nga wa ai re.

January 25 ya shani hta mung Dingda ginwang ginjaw shara Dima mare num shang hta gate dung na matu hkyen wa ai majaw, shada lapran ga law hkat ai lam ni nga wa ai re.

Dai zawn shada lahkawng maga mang hkang byin ngut ai hpang, January 26 ya shana maga de hkying 6 ram hta Salang ni shada a tsawm bawng ban jahkrup la lu ai hpang TNLA ni Dima mare na dawm mat wa ai hpang a tsawm pri nem ai hku shangut la lu sai lam ginra masha langai KNG de ndai zawn tsun dan wa ai re.

“Ya gaw pri nem sai, mai kam sai ngu rai gaw rai n re, Balawng ni Dingda ginwang ginjaw nga ai makau de shani kahtep wa ai ngu gaw shan hte n chye na n mai byin ai, da sang mara tam mayu na dai hku galaw wa ai rai nga ai, shan hte dai hku galaw ai n tsa na salang ni pyi chye kun? Anhte nga ai kaw dai hku ni gahtep wa ai majaw, nbyin ging ai lam ni byin wa ai rai nga ai nga,” tsun dan ai re.

TNLA&KIA manghkang byin

Ya ten Mung Wi mare hta shada ga law hkat ai lam gaw n nga sai rai tim, lahkawng maga de na ginra masha lam hte seng na matut shaja hkat taw nga ai re.

Dingda Ginwang Ginjaw dap jung da ai Dima mare de Balawng TNLA dap ni htu shang wa na, gate shara wa jahkrat wa ai majaw, mang hkang byin wa ai rai nga ai.

 

Related Articles

Back to top button