Majan ShigaShiga

Indaw majan a majaw, Myitkyina Madalay lam pat na hpe mung shawa ni myit tsang

Sagaing Indaw mare na hpang jahtum ngam ai Myen hpyen byuha dap shara hpe KIA woi awn ai PDF pawng hpawm dap ni dai hpawt kaw na kalang bai hpyen n gun kaba the htim gasat taw sai lam chye lu ai.

Dai hpawt January 27 ya jahpawt kaw na KIA,ABSDF, PDF pawng hpawm dap ni hpyen n’gun kaba hte kalang bai htim gasat taw nga ai hta, Myen hpyen dap maga na mung nbungli the laja lana wa gap sharu bun taw ai lam, dai ginra na Shawng lam magam gun ni kaw na chye lu ai.

“Dai hpawt kaw na bai hpang taw sai Myen hpyen dap maga na nbungli hte agying bai wa gap sharu  taw nga sai, matut na naw laja na re, anhte na maga mung nlu yang lu hkra shakut na re rai, shan hte maga na mung n tat hkra nga jang gaw, nbungli agying lang na rai, gasat hkat taw nga ding yang re,” nga tsun ai.

Ya na zawn Indaw majan bai laja wa ai majaw, Myitkyina Mandalay lam bai pat mat na gunrai manu ni  bai rawt tsaw wa na hpe ginra masha ni myit tsang nga ma ai re.

Pawng hpawm dap maga de na htim gasat wa ai hte rau Myen hpyen dap maga de na mung nbungli hte laknak kaba ni gap sharu taw ai lam tsun ai re.

Myen hpyen dap maga de na laknak kaba ni hkrup mara gap shadam bun ai majaw, mung shawa marai 2 hkra hkala ai lam nga ai hpe chye lu ai.

Sagaing Indaw muklum hpe 2024 ning August shata 16 ya shani  kaw na htim gasat taw nga ai gaw, gasat dat hkring dat rai num daw hte num daw gasat taw ai gaw, ndai kalang hte rai yang numdaw 4 lang rai sai lam chye lu ai.

Ya ten Indaw muklum kata na Balik dap, Uphkang rung hte Myen hpyen hte seng ai shara ni yawng hpe pawng hpawm dap maga zing madu da sai rai nna, ya hpang jahtum Myen hpyen hpyen dap kaba langai hpe sha htim gasat taw sai mung rai nga ai.

Indaw mare gaw, Jinghpaw Mung hte Sagaing jarit hta nga ai mare giwang madang nga ai mare kaba rai nna Jinghpaw mung a matu hkawm sa hkawm wa lam hta ahkyak ai mare kahtawng langai mung rai nga ai.

Related Articles

Back to top button