Hpyen yen mung shawa ni Sumbrang hkum gaya ai lam byin na Tsi mawan garum ningtum ra nga.
Waimaw Laban mare hta hprawng yen nga ai Aung Mye 2 hpyen yen mung shawa ni hta ya ten, sumbram, maru gaya ai lam Ma chyangai kaw na asak kaba sai ni du hkra byin taw nga ai lam hpyen yen amyu shayi langai KNG de tsun dan wa ai re.
Hpyen yen dabang kata nta htinggaw shagu ngu na kaw byin hkrum hkra taw nga tim, chya na tsi mawan n nga ai majaw, hkum gaya ai shata 5 ram na wa tim mai tsai wa ai lam n nga dai hku matut gaya hkam sha ra taw ai re.
Ya na zawn hkum gaya ai lam gaw chyu chyu ai ma chyangai kaw na, gumgai dingla du hkra byin ai majaw, garum ningtum ra ahkyak taw nga ai lam hpyen yen amyu shayi langai KNG de ndai zawn tsun dan wa ai re.
“Nkau gaw hkum ting byin na Myiman de du hkra hkra ai n inga ai, ngut na ma chyu naw chyu ai ma chyangai ni mung byin ai, ma Chyangai ni ngam yang je htam matsan shayen hkum hkan, anhte hpyen yen dabang kaw grai sawng taw nga ai law,” nga tsun ai re.
Tsi mawan hte seng na KBC kaw na Mobile Team nga na shata lahkawng hta kalang ram sa ai rai tim sumbrang gaya ai lam hte seng na tang du ai tsi mawan n lu garum jaw ai majaw, ya ten du hkra a tsawm n mai shi ai re.
Ya na zawn hpyen yen dabang kata sumbram gaya wa ai lam gaw, n kau Mali hka hta hka sa shin ai kaw na byin wa ai hpang hpyen yen dabang kata shada bai kap bra hkat wa ai kaw na, dabang ting kap bra wa ai re lam hpyen yen mung shawa ni matut tsun dan ai re.
Ya na zawn hpyen yen mung shawa ni hta sumbram byin law wa ai hte seng na, Kachin Backpack tsi hpung na lit nga ai Sara langai n dai zawn matut tsun da ai re.
“Hkumhkrang jasan jaseng lam gawng kya na mung mai byin ai, masha law law the nga ai shara re nga yang Langai the langai kaw na kap ai mung mai byin ai, Mali hka ja nau htu sha kau sai re nga yang gaw, n san seng mat sai le dai Pada hkrai hkrai re hka hpe lang hkrum na mung mai byin ai,” nga tsun hpaji jaw da ai re.
Ya na zawn hkum gaya ai lam ni madung atsawm mai tsai lu na matu gaw, san seng ai hka lang ra na hte bawp tawng ni hte a tsawm tinang hkum tinang jasan jaseng na nga ra ai lam tsun ai re.
Aung Mye 2 mare masha ni wa du hprawng yen nga ai Laban mare hpyen yen dabang kata hta htinggaw 130, masha marai 600 hkawt nga ai hpyen yen dabang re lam chye lu ai.
