Waimaw ginwang Hkat Cho mali hka kau mayan na mare ni hta Myen hpyendap dap jung shara jahkrat nga nna, Mung shawa hkawm sa hkawm wa lam hpe aten masat da ya nna, ladu lai san jep ai lam ni galaw nga ai nga, Waimaw ginra masha langai tsun ai re.
Ndai 2025 shaning ningnan hpang kaw na, Waimaw Hkat Cho lam numbraw Muk Loi mare makau hta dap jung nga ai Myen hpyen dap ni gaw, jahpawt hkying 6 hte hkying 9 lapran, shana maga hkying 3 na hkying 5 lapran hta sha lai shangun taw nga ai majaw, Yi sun galaw nga ai mung shawa ni yak hkak hkrum taw nga ai lam Waimaw ginra masha langai KNG de ndai zawn tsun wa ai re.
“Ya dai lam hku hkawm sa na n loi mat sai, Muk Loi mare rai n du shi yang Lagat hpun tu ai makau kaw gate jahkrat nna jahpawt maga kalang, shana maga kalang sha hpaw ya na lai shangun taw ai. ngut na mung mare num shang shagu hta gate nga ai, dai majaw mung shawa ni a matu hkawm sa hkawm wa yak mat ai,” nga tsun ai re.
Waimaw Hkat Cho lam, Mukloi, HKat Cho, Mahkanti, Nawng Hkyi, Jam Ga mare num shang shagu hta mung, ga gaduk ni shagreng nna, dap jung nga taw nna, masha pru shang lam ni hpe ding yang san jep nga ai nga tsun ai re.
Dai mare hkan na mung shawa law malawng gaw 2024 ning March shata ram kaw na Lasang Awng wa a ginra de hprawng yen taw nga sai re.
Dai ginra na mung shawa ni hpyen yen aten ladaw na wa ai hte rau, malu masha hte laga lam shagu yak hkak wa ai majaw, hpyen yen n kau tinang mare dum nta de bai nhtang wa let yi sun wa galaw ai lam hta Myen hpyen dap maga na ya na zawn aten masat nna sha lai shangun ai majaw, lam shagu hta yak hkak nga ai lam ginra masha ni tsun nga ma ai re.
Lai wa sai 2024 ning May shata kaw na KIA hte pawng hpawm dap ni Waimaw ginra de htim shagrawt majan gap gasat wa ai majaw, Myen hpyen dap ni jak li daru yawng pat kau ya ai majaw, dai ginra na mung shawa ni dai lam kaba langai hpe sha madung machyu na lai ra taw ai re.
