Hkawnglanhpu ginra na Pyithutsit dap shara langai hpe KIA htim gasat zing madu
Jinghpaw mung Sinpraw dingdung Hkawng Lan Phu ginwang kata na Pyithutsit dap shara langai hpe KIA hte pawng hpawm dap ni htim gasat zing madu la lu wa ai nga Dapba 7 na Salang langai KNG de tsun dan wa ai re.
Salang Danggu Dang woi awn ai, Lahu Se HKawng Lan Phu Pyithutsit dap shara langai hpe Wunpawng Mungdan Shanglawt Hpyendap KIA hte PDF pawng hpawm dap ni mani December 15 laban ya shana maga hkyting 6 chyen daram hta htim gasat zing madu la lu wa ai lam, Dapba 7 na Salang langai KNG de tsun dan wa ai re.
“Lahu Se dap shara hpe December 15 ya shani ka-ang hkying 12 jan kaw na gap hpang ai, shana maga hkying 5 jan ram hta yawng lu la sai, lu la ai hpang, Pyithutsit ni bai wa n htang gap ai majaw hkying 6 chyen du hkra bai majan gap gasat hkat wa ai dai kaw anhte maga na mung loi li bai hkala hkrum ai,” nga tsun dan wa ai re.
Ya majan byin ai Lahu Se mare gaw, Hkawng Lan hpu mare hte deng 40 ram tsan ai shara rai nna Hkawnglanhpu hte Lang Se mare lapran hta nga ai mare kaji langai re lam chye lu ai.
Lahu Se dap shara hta Pyithutsit hpyen n’gun 100 ram nga ai shara rai nna, dai dap shara hpe KIA htim gasat wa ai hpang Pyithutsit ni yawng hprawng yen mat ai majaw, dai shara yawng hpe pawng hpawm dap maga shana hkying 7 ram hta dap shara yawng jasan kau lu ai lam chye lu ai.
Lai wa sai shata, Lang Se mare hpe sinat kalang mung n shangoi ai sha jahkrup bawngban Zing madu kau ngut ai hpang, ya na zawn Hkawnglanghpu ginwang maga na Pyithutsit dap shara hpe bai htim gasat zing madu wa ai mung rai nga ai.
Ya ten KIA hte pawng hpawm dap maga na Manmaw Manje mare hpe hpyen n’gun kaba hte laja lana htim gasat taw nga nna, shani shagu majan laja taw nga ai re.
