Mogaung Deng 8 shagyit shara de Myen hpyen dap htu shadut wa ai majaw majan byin
Mogaung hte Kamaing lapran Deng 8 shagyit hpe Myen hpyen dap hte SNA dap pawng hpawm hpyen n’gun 300 ram hte htu shadut htim gasat wa ai majaw, majan byin wa ai nga, KIA hte ni nawn ai ni tsun ai kaw na chye lu ai.
December 12 ya shana hkying 6 ram kaw na, Mogaung Sah Maw maga hte Namti lahkawng maga de na hpyen n gun kaba the htu shadut htim gasat wa ai majaw majan gap gasat hkat wa sai re.
Ya dai majan byin ai shara gaw lai wa sai ten Myen hpyen dap ni dung nna, hkawm sa hkawm wa mung shawa ni hpe laja lana san jep ai shara rai nna, Kamaing lam Namshem mare hkan na Myen hpyen dap ni hprawng mat ai hpang, dai shara kaw nga ai Myen hpyen dap ni mung hprawng mat ai hpang, KIA ni wa du dap jung nga ai shara mung rai nga ai.
“Dai shara kaw Shanglawt ni dung ai grai na sai gaw, dai Nam sheng Myen dap ni hprawng mat ai hpang, gade nna yang yawng hprawng mat sai gaw” nga Kamaing ginra masha langai KNG de tsun ai re.
Ya na zawn KIA ni dap jung taw nga ai shara hpe Myen hpyen dap the Sam Hkyeng SNA ni pawng nna hpyen n gun kaba hte htu shadut htim gasat wa ai rai nga ai.
Ndai majan masa lam hte seng nna, KIA shiga magam dap lithkam Dukaba Nhpang Naw Bu hpe matut mahkai san shaga yu ai rai tim, Dukaba Naw Bu Phone n hta ai re.
