Kanpaiti mare kaba hta KIO uphkang hkrang masa lam hte seng nna mung shawa yawng hpe tsun sang lang dan ai lam ni galaw wa ai nga ginra masha ni kaw na chye lu ai.
Mung shawa hkrum zup hpawng hpe November 25 Ya shani galaw wa ai rai nna, mung shawa yawng hte ga san ga htai lamang hku na galaw ai n re sha, KIO maga tsun sang lang ra ai lam ni hpe sha tsun sang lang mat ai re nga tsun ai re.
Muklum Uphkang hkrang hte bung hkra, shawoi na uphkang hkrang ni hta grau hkrak ai hku na woi awn up hkang sa wa na re nga, KIO tsun nna, Myen hpyen magam dap lakung yawng hta KIO shang shara la nna, KIO uphkang sai ru hkrang hte sa taw sai nga Kanpaiti ginra masha langai KNG shiga de tsun dan ai re.
“KIO uphkang sai ru hkrang hte seng nna, mung shawa na hte hkrum jahta ai lam woi galaw wa ai, Uphkang hkrang dap lakung shagu na ni mung du wa sai, dai ni hkrum jahta ai lam hta, KIO maga Kanpaiti hpe zing wa ra ai masa hte, matut galaw sa wa na shawng lam masa ni hpe KIO maga tsun sang lang mat wa ai nga,” tsun dan ai re.
KIO maga na mung, Zahkung Ting Ying woi awn up hkang nga ai Chihpwi, Pang Wa, Saw Law Kanpaiti ginra yawng hpe zing madu mat wa ra ai lam ni hpe tsun sang lang mat wa nna, KIO uphkang sa wa na masa lam hta, mung shawa yawng garum madi shadaw shang lawm na lam tsun mat wa ai re lam chye lu ai.
Majan ten laman hprawng yen mat ai mung mare masha yawng hpe Kanpaiti mare de bai wa nga na matu shaga taw ai lam ni mung nga ai re.
Shaning 50 ning jan KIO a uphkang n pu hta n nga wa yu ai Kanpaiti mare Uphkang hkrang masa hpe ndai laman a tsawm naw matut la yu ra ai lam ginra masha ni tsun ai re.
“Shan hte tsun mat wa ai chyawm shawoi na hta grau hkrak hkra galaw sa wa na nga chyawm tsun ai le, hpa majaw nga yang shawoi kalang mung n up wa yu ai ni up sana re majaw gaw laklai na re, ya chyawm mung shawa ni a matu hkrup chya chyawm rai n byin shi ai,” nga tsun ai re.
KIO maga dai ginra hta Kani Nang Hpang Pat Jasan ai amu magam hpe mung ja ja galaw sa mat wa na re lam tsun shalawm mat wa ai lam chye lu ai.
KIO maga mung shawa yawng hpe bai wa nga mai sai lam ahkang jaw da tim, mung shawa maga Myen hpyen dap nbungli hte bai gap bun na hpe myit tsang ai ni mung nga taw ai re.
Dai hkrum shaga ai lamang hta ga san ga htai galaw na ahkang n jaw ai sha KIO maga tsun ra ai lam ni hpe sha tsun mat wa ai masa re lam ginra masha ni tsun ai re.
