Laknak lang rawt malan hpung ni up madu da ai Miwa jarit Chyinghka yawng hpe matut pat da ya na re nga, Miwa Asuya maga na Myen hpyen dap masha pru shang gawn hkang hkring mang Slg Myint Chyai Shwe Li du ai ten tsun ai nga, November 21 ya shani shapraw ai Myen hpyen shi laika hta tsun da ai re.
November 20 ya shani Myen hpyen dap masha pru shang gawn hkang hkring mang Slg Myit Chyai Shwe Li du ai ten, Miwa asuya maga tsun sadi jaw dat ai re nga tsun da ai re.
Sammung ginra na Jarit chyinghka yawng hpe Kokang MNDAA hte Balawng TNLA dap ni zing kau ma sai rai nna, Jinghpaw mung na Miwa jarit chyinghka yawng hpe KIA dap zing kau sai re.
Ya na zawn laknak lang rawt malan hpung ni zing madu da sai jarit chyinghka ma hkra hpe Miwa Asuya maga Myen hpyen dap hte a tsawm jahkrup la ngut ai hpang she tara shang a tsawm hpaw ya na re nga na tsun sadi jaw wa ai mung rai nga ai.
Myen Miwa jarit chyinghka kaba langai sha ngam sai, Muse jarit lam hpe, Myen hpyen dap masha pru shang gawn hkang hkring mang sa du yu gawan kau da ai nga shi laika hta tsun da ai re.
Lai wa sai November shata praw kaw Gumshem Myen hpyen dap ningbaw Min Aung Hlaing wa Miwa Asuya hkringmang daju hpe Jarit chyinghka pru shang lam yawng hpe pat kau ya na matu sa hpyi shawn wa ai re.
Miwa maga de na ya na zawn jarit chyinghka yawng pat kau ya ai majaw, Mung shawa ni galaw lu galaw sha lam hte jak sau gunrai manu ni tsaw rawt taw ai majaw yak hkak hkrum taw nga ai re.
KIA htim gasat zing kau ai Kanpaiti hpaga gun rai ginlen dabang hta Miwa langu mawdaw ni ding yang matut shang nga nna, Miwa maga gunrai hpa mung n shalai ai re.
