Mungmyit Sinli, Mungbaw Pa mare na, Jinghpaw Wunpawng hkalup hpung hkritstan lupding lupra hpe Kokang MNDAA kaw nna, atik anang shara kashun hkyen wa ai majaw, Mungbaw Pa mare Nawku hpung na Mung shawa ni myit tsang nga ai re.
Lai wa sai October praw 1 ya shani, Kokang MNDAA ni shatsam da ai, Mungbaw pa mare uphkang salang wa kaw na mungbaw nawku hpung magam gun ni hpe, lupwa the seng nna, shara madu zing la na lam sa tsun shana wa ai hpe mare masha ni myit nhkawn ai lam bai tsun n htang dat ai lam the seng nna, ginra masha langai KNG shiga dap hpe ndai tsun dan ai re.
“MNDAA kaw na mare salang wa, sa wa nna, sa jahkrup ai nga, kaja nga jang gaw sa jahkrup ai n rai nga, shanhte nan yawng jingrim galaw da na sa shana ai ngu ram sha rai nga ai. Lupding lupra kaw Kumshu yi galaw na re nga rai ni pyi yawng mari da ngut nna she sa shana ai gaw. Anhte myit nhkrum ai lam tsun yang dan jang gaw zing sai nga di tsun ai. anhte mung seng ang ai MNDAA hpang de ading tawk bai tsun rai na, ya du hkra gaw naw zim taw ai.” nga nna, Mungbaw pa mare na buga hpung magam gun langai tsun ai re.
Kokang MNDAA npu, mungbaw mare salang wa gaw, buga hpung ni hpang de lupwa kawng hta kumshu sun hkai na matu tsun shana wa ai hpe nawku hpung hku na ahkang njaw ai majaw, Lupwa hpe zing sai lam atik anang galaw wa ai lam tsun ai re.
Dai majaw, October praw 3 ya shani gaw.. Mungbaw buga masha marai 150 jan Lupding lupwa de sa nna, hkyen jasan makawp ai lam ni galaw wa nna, seng ang ai Kokang ni hpang de mung tsun ninghkap ai majaw.. ya du hkra gaw masa zim taw ai lam matut chye lu ai.
Maga mi de, Kokang maga na mung.. Lupding lupra shara hta Kumshu hkai na matu bungli hpang na ri ri galaw nga sai masa re lam chye lu ai.
Ndai Lupwa gaw Lamu ga Eka 20 rai nna, Mungbaw mare kaba a dingda maga Loilem pa kaw rai nga ai.
Ndai lupding lupwa shara hpe mungbaw ginra de myen hpyendap n du shi ai ten.. Namhkyep du ni uphkang ai prat kaw nna, masat la da ai shara rai nna, myen hpyendap du ai ten gaw.. 2008 ning ram hta asuya kaw tara shang shara masat la wa ai lam mung rai nga ai.
“shawa hte seng ai, buga hpung the seng ai lupwa hpe mi ngu yang.. shanhte gaw kaga ni mung nmai lup ai me ngu hku tsun shaga ai. Ya MNDAA a galaw ai lam hpe yu dat yang, shanhte npu e sha taw ra ai hku ang ai ka rai nga. Dai majaw anhte mung Nawku hpung gaw nanhte n pu e n taw ai, kadai mi up hkang tim, myen up hkang tim, nawku hpung gaw shi hte shi sa wa ai baw she re. shawng hkan e mung, shanhte tsun ai hpe madat yu yang, Nawku hpung mung ya gaw shanhte gap di da sai re majaw, shanhte a n pu e sha taw ra na ngu hku galaw wa ai ka rai nga ai. dai majaw, ndai Kokang hte gaw ram ram yak na masa nga ai. ” nga nna, Mungbaw na buga hpung magam gun wa matut tsun ai re.
Ya ten.. Mungbaw ginra hpe Kokang MNDAA gaw tinang gap di tawn ai shara re majaw.. yawng hkra Kokang Npu kaw sha taw shangun mayu nga ai lam mungbaw ginra masha ni tsun ai re.
