Majan laja taw nga ai Pangwa ginra hta Pyithutsit hpyen lahkawn nna, hpyen wunkat n jaw ai sha majan pa de sa nga
Majan laja taw nga ai Pangwa ginra hta Pyithutsit hpyen lahkawn nna, hpyen wunkat n jaw ai sha majan pa de sa nga.
Pangwa mare makau Lupyi mare ni hta majan laja lana gap gasat hkat taw nga nna, Myen hpyen dap maga nbungli ni hte sa gap bun taw nga ai lam, ginra masha langai KNG de tsun dan wa ai re.
Pangwa mare hte deng 10 daram sha tsan ai Lu Pyi mare hta majan laja taw nga nna, dai hpawt hkying 10 daram kaw na Y-12 nbung ni hte wa gap gasat taw nga ai nga tsun dan ai re.
Majan laja lana gap gasat wa ai majaw Lu Pyi mare na mung shawa yawng Pangwa mare de hprawng yen taw nga ai re.
Lu Pyi mare hta, Myen hpyen jarit sin dap (1002) dap jung tawn ai dap shara rai nna, Ga sau dabang hkan bungli galaw nga ai ramma ni hpe laja lana hpyen lahkawn la nna, shawng lam de sa taw nga ai nga ginra masha ni KNG shiga dap de tsun dan wa ai re.
“mani hte mana mung.mung shawa bungli galaw masha ni hpe hpyen lahkawn la nna, ya byin nga ai majan pa de mana nsin e nan sa sa ma ai d,a masha gaw manga shi ram lom mat ai,” nga tsun dan wa ai re.
Zahkung Ting Ying woi awn ai Pyithutsit dap ni kaw na, ndai laman mu mamu mung shawa ni hpe hpyen lahkawn nna, hpyen wunkat mung n jaw ai sha, shawng lam majan pa de sa taw ai majaw, Si hkala ai ni law taw nga ai nga, KIA magam gun ni tsun ai re.
Ya na zawn majan laja lana gap gasat nga ai lam hte seng nna, ginra masha ni hku na a tsawm jahkup bawng ban la na hpe ra sharawng taw nga ai re.
Chihpwi hte Saw Law mare kaba ni hpe KIA htim gasat zing madu kau ai hpang, Pang Wa mare maga de bai htim gasat wa ai masa rai nna, Myen hpyen dap maga na mung nbungli the shani shagu sa gap garum taw nga ai re.
